Muhtaram Prezidentimiz Sh.M.Mirziyoyev tomonidan 2025-yil 15-may kuni “Ta’lim tizimidagi islohotlar samaradorligini yanada oshirish masalalari” o‘tkazilgan videoselektorda mahalliy Kengash deputatlariga belgilab berilgan vazifalarni jamoatchilikka tatbiq qilish maqsadida xalq deputatlari shahar Kengashi deputatlari tomonidan targ‘ibot-tashviqot ishlari davom etmoqda.

Xalq deputatlari Termiz shahar Kengashi deputati O.Lapasova tashabbusi bilan Termiz shahridagi 8-sonli umumta’lim maktabida o‘qituvchilar ishtirokida davra suhbati tashkil etildi.

Davlatimiz rahbari ta’limda sifat bo‘lishi uchun, eng avvalo, pedagoglarni tayyorlash va malakasini oshirish tizimi bunga tayyor bo‘lishi kerakligini ta’kidlab, bu borada aniq vazifalarni belgilab berdi. Shu o‘rinda, yig‘ilishda pedagoglarni tayyorlash va malakasini oshirish tizimini takomillashtirishga qaratilgan vazifalarning quyidagi muhim jihatlariga e’tibor qaratish maqsadga muvofiq ekanligini ta'kidladi.

Eng avvalo, pedagoglarni rivojlangan xorijiy davlatlarda malakasini oshirish tizimini takomillashtirish. Mazkur tizim o‘qituvchilarga yuqori sifatli ta’lim standartlari, innovatsion metodlarni o‘rganish va tajriba almashish imkoniyatini beradi. Rivojlangan davlatlarda pedagoglarning malakasini oshirish kurslari zamonaviy metodika, psixologiya, pedagogika va axborot texnologiyalari asosida tashkil qilinadi. Xorijdagi malaka oshirish jarayonlarida o‘qituvchilar yangi pedagogik texnologiyalar, STEAM ta’limi, inklyuziv ta’lim va shaxsga yo‘naltirilgan yondashuvni amalda ko‘rib, o‘zlashtiradi.