Tumanda “Mustaqillik to‘yi” harbiy-vatanparvarlik festivali o‘tkazildi

O‘zbekiston Respublikasi davlat mustaqilligining 35 yilligi munosabati bilan mamlakatimiz bo‘ylab “Yagona Vatan, yagona xalq bo‘lib, yangi hayot va kelajak yaratamiz!” shiori ostida o‘tkazilayotgan “Mustaqillik to‘yi” harbiy-vatanparvarlik festivali Sariosiyo tumanida ham yuqori saviyada tashkil etildi.

 Festivalda xalq deputatlari tuman Kengashi deputati S.Kasimov, xalq deputatlari tuman Kengashi huzuridagi Yoshlar maslahat guruhi rahbari D.Sattorv, yozuvchilar, shoirlar, ma’naviyat targ‘ibotchilari, baxshilar, san’atkorlar hamda harbiy xizmatchilar ishtirok etib, aholi va yoshlar bilan uchrashuvlar o‘tkazdi. Tadbir Yangi O‘zbekiston istirohat bog‘idagi kinoteatrda harbiy-vatanparvarlik mavzusidagi film namoyishi hamda ijodkorlar bilan ochiq muloqotdan boshlandi.

 Festivalning ikkinchi qismida harbiy psixologlar tomonidan treninglar, sport musobaqalari, Faxriy qorovulning ko‘rgazmali chiqishlari, harbiy orkestr va san’atkorlar ishtirokidagi konsert dasturi namoyish etildi. Shuningdek, yosh harbiy xizmatchilar o‘rtasida kitobxonlik yo‘nalishida “Zakovat” intellektual o‘yini o‘tkazilib, g‘oliblar diplom va esdalik sovg‘alari bilan taqdirlandi.

 Festival davomida yoshlarni vatanparvarlik ruhida tarbiyalash, milliy qadriyatlarga hurmat va kitobxonlik madaniyatini yuksaltirishga qaratilgan ma’naviy-ma’rifiy tadbirlar tashkil etildi.