Xalq deputatlari Qumqo‘rg‘on tuman Kengashi kotibiyati mudiri, deputat Sh.Abdusamatov tomonidan «Besh qahramon» mahallasi hududidagi «Oqsoy buyum bozori» o‘rnida yangidan barpo etilayotgan Markaziy dehqon oziq-ovqat bozori loyihasi doirasida olib borilayotgan qurilish ishlari o‘rganildi.

O‘rganish davomida yangi bozorni barpo etish jarayoni, qurilish ishlarining borishi hamda loyihada belgilangan vazifalarning amalga oshirilishiga e’tibor qaratildi.

Mazkur loyiha, avvalo, aholini sifatli va arzon oziq-ovqat mahsulotlari bilan ta’minlash, dehqon va tomorqa egalarining o‘z mahsulotlarini ortiqcha vositachilarsiz iste’molchilarga taklif etish imkoniyatlarini kengaytirish hamda hududda savdo infratuzilmasini zamonaviy talablar asosida rivojlantirishga qaratilgan.

Yangi bozorda dehqonlar, tomorqa egalari va tadbirkorlar uchun qulay savdo sharoitlari yaratilishi ko‘zda tutilgan.

MA’LUMOT UCHUN:

Yangi barpo etilayotgan Markaziy dehqon oziq-ovqat bozorida 120 ta savdo do‘koni va 250 ta savdo rastasi tashkil etilishi rejalashtirilgan. Shuningdek, loyiha doirasida 600 nafarga yaqin aholining doimiy bandligi ta’minlanishi ko‘zda tutilgan.

Mazkur bozorning ishga tushirilishi hududda tadbirkorlikni rivojlantirish, yangi ish o‘rinlarini yaratish, mahalliy ishlab chiqaruvchilarni qo‘llab-quvvatlash va aholiga qulay savdo xizmatlarini ko‘rsatish imkoniyatlarini kengaytirishga xizmat qilishi kutilmoqda.

Shu bilan birga, loyihaning amalga oshirilishi tumanning savdo infratuzilmasini yanada takomillashtirish va ijtimoiy-iqtisodiy salohiyatini oshirishda muhim ahamiyat kasb etadi.

Deputatlik nazorati — hududlarda amalga oshirilayotgan muhim loyihalarning samarali va sifatli ijrosini ta’minlashga xizmat qiladi.