Fuqarolar murojaatlari joyida o‘rganildi

Xalq deputatlari Termiz tuman Kengashi raisi S. Nazarov, 5-Uchqizil saylov okrugi deputati Sh. Norsayev hamda Kengash mutaxassisi K. Abdullayeva Uchqizil MFY raisi bilan birgalikda hududdagi muammoli masalalarni joyiga chiqqan holda o‘rgandi.

Jumladan, Obod ko‘chasida fuqarolar bilan uchrashuv o‘tkazilib, ularning murojaat va takliflari tinglandi. Uchrashuv davomida aholining maishiy gaz ballonlari ta’minoti va ijtimoiy xizmatlar sifati bilan bog‘liq qator muammolari ko‘tarildi.

Xususan, fuqarolar tomonidan maishiy gaz ballonlari o‘z vaqtida yetkazib berilmayotgani, ayrim gaz ballonlarining ventillari (jo‘mrak qismi) eskirgani va texnik jihatdan yaroqsiz holga kelgani, shuningdek, ayrim hollarda gaz ballonlari belgilangan me’yordan kam miqdorda gaz bilan yetkazib berilayotgani yuzasidan murojaatlar bildirildi.

Kengash raisi, deputat hamda Kengash mutaxassisi tomonidan bildirilgan murojaatlar qayd etilib, mazkur masalalar yuzasidan mas’ul tashkilotlarga deputatlik so‘rovlari yuborilishi hamda murojaatlarda ko‘rsatilgan holatlar joyida o‘rganilib, qonunchilikda belgilangan tartibda tegishli choralar ko‘rilishi ta’kidlandi.