Deputat ayollar bilan uchrashib, qonun mazmun-mohiyatini tushuntirdi

Xalq deputatlari Termiz tuman Kengashi 1-Xalqobod saylov okrugi deputati N. Ruziyeva tomonidan saylov okrugi hududida istiqomat qiluvchi xotin-qizlar bilan navbatdagi uchrashuv o‘tkazildi.

Uchrashuv davomida ishtirokchilarga Oʻzbekiston Respublikasining “Xotin-qizlar va erkaklar uchun teng huquq hamda imkoniyatlar kafolatlari toʻgʻrisida”gi Qonunining mazmun-mohiyati keng tushuntirildi. Mazkur Qonun Qonunchilik palatasi tomonidan 2019-yil 17-avgustda qabul qilingan hamda Senat tomonidan 2019-yil 23-avgustda ma’qullangan.

Suhbat jarayonida qonunning asosiy maqsadi xotin-qizlar va erkaklar uchun barcha sohalarda teng huquq hamda teng imkoniyatlarni ta’minlash, jins bo‘yicha kamsitishning oldini olish, davlat va jamiyat boshqaruvida, mehnat, ta’lim, sog‘liqni saqlash hamda boshqa sohalarda teng ishtirok etish uchun huquqiy kafolatlarni yaratishdan iborat ekanligi alohida ta’kidlandi.

Shuningdek, uchrashuv davomida xotin-qizlarni ijtimoiy qo‘llab-quvvatlash, ularning huquqiy savodxonligini oshirish, qonunda belgilangan huquq va kafolatlardan samarali foydalanish masalalari muhokama qilinib, ishtirokchilarni qiziqtirgan savollarga batafsil javoblar berildi.