Xalq deputatlari Qo‘qon shahar Kengashining “Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha” doimiy komissiyasining navbatdagi yig‘ilishi bo‘lib o‘tdi.

Yig‘ilish kun tartibidan Qo‘qon shahrida aholining ijtimoiy ehtiyojmand toifalariga mansub fuqarolarni 2027-yilda ishga joylashtirish uchun ish o‘rinlarining eng kam sonini belgilash va ularni zaxiraga qo‘yish masalasi o‘rin oldi.

Muhokamalar davomida Kambag‘allikni qisqartirish va bandlikka ko‘maklashish bo‘limi hamda “Inson” ijtimoiy xizmatlar markazi takliflari ko‘rib chiqildi. Unga ko‘ra, 2027-yilda ijtimoiy himoyaga muhtoj fuqarolarning bandligini ta’minlash, ularning mehnat faoliyatiga jalb etilishi uchun zarur shart-sharoitlar yaratish maqsadida jami 1 551 ta ish o‘rnini zaxiraga qo‘yish belgilandi.

Mazkur ish o‘rinlarini ijtimoiy ehtiyojmand toifalar kesimida quyidagicha taqsimlash nazarda tutilgan: nogironligi bo‘lgan shaxslar uchun — 693 ta, ijtimoiy reyestrga kiritilgan oilalar a’zolari uchun — 467 ta, jazoni ijro etish muassasalaridan ozod qilingan shaxslar uchun — 282 ta, oilaviy (maishiy) zo‘ravonlikdan jabrlangan shaxslar uchun — 63 ta, yetim va ota-ona qaramog‘idan mahrum bo‘lgan yoshlar uchun — 39 ta, odam savdosidan jabrlangan shaxslar uchun esa 7 ta ish o‘rni.

Yig‘ilishda ish beruvchilar uchun belgilangan talab va tartiblarga ham alohida e’tibor qaratildi. Qonunchilikka muvofiq, ijtimoiy ehtiyojmand toifalarga mansub fuqarolarni belgilangan eng kam sondan ortiq miqdorda ishga qabul qilgan ish beruvchilar subsidiya olish huquqiga ega bo‘lishi mumkinligi ta’kidlandi.

Shuningdek, korxona va tashkilotlar rahbarlari zaxiraga qo‘yiladigan ish o‘rinlarining kamida 25 foizini yil boshlanishidan oldin, qolgan qismini esa birinchi chorak davomida tayyor holatga keltirishi hamda bu haqda vakolatli organga axborot taqdim etishi lozimligi qayd etildi. Belgilangan talablarni bajarmagan ish beruvchilarga nisbatan qonunchilikda nazarda tutilgan javobgarlik choralari qo‘llanilishi mumkinligi ham eslatib o‘tildi.

Mazkur masalaning ko‘rib chiqilishi shaharda aholi bandligini ta’minlash, ijtimoiy himoyaga muhtoj fuqarolarning mehnat bozoridagi imkoniyatlarini kengaytirish hamda ularning jamiyat hayotida faol ishtirok etishiga ko‘maklashishga qaratilgan.

Xalq deputatlari Qo‘qon shahar Kengashi