Ozod mahallasida yog‘och tayanch ustunlarni temir-beton tayanch ustunlarga almashtirish masalasi o‘rganildi

O‘zbekiston Respublikasining "Elektr energetikasi to‘g‘risida"gi Qonuni hamda "Mahalliy davlat hokimiyati to‘g‘risida"gi Qonuni talablaridan kelib chiqib, hududlarda elektr ta'minoti infratuzilmasini modernizatsiya qilish, aholini barqaror va xavfsiz elektr energiyasi bilan ta'minlash yuzasidan deputatlik nazorati tadbirlari izchil davom ettirilmoqda.

Shu munosabat bilan Xalq deputatlari Namangan shahar Kengashi kotibiyati bosh mutaxassisi A.Nurmatov Namangan shahridagi Ozod mahallasi hududida mavjud yog‘och tayanch ustunlarni zamonaviy temir-beton tayanch ustunlarga almashtirish masalasini joyida o‘rgandi.

O‘rganish davomida elektr uzatish tarmoqlarining texnik holati, foydalanish muddatini o‘tab bo‘lgan yog‘och tayanch ustunlarning holati, ularni bosqichma-bosqich temir-beton tayanch ustunlarga almashtirish zarurati hamda mazkur yo‘nalishda aholi tomonidan bildirilgan murojaat va takliflar atroflicha tahlil qilindi.

Deputatlik nazorati yakunlari bo‘yicha elektr tarmoqlari infratuzilmasini yanada modernizatsiya qilish, eskirgan tayanch ustunlarni bosqichma-bosqich yangilash, elektr ta'minoti ishonchliligini oshirish hamda fuqarolar uchun xavfsiz va uzluksiz elektr ta'minotini ta'minlash yuzasidan mas'ul tashkilotlarga tegishli taklif va tavsiyalar bildirildi.

Mazkur yo‘nalishda amalga oshirilayotgan ishlar elektr ta'minoti tizimining barqarorligini mustahkamlash, avariyaviy holatlarning oldini olish hamda aholi turmush sifatini yanada yaxshilashga xizmat qiladi.