Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat F.Axmedov tuman Tibbiyot birlashmasiga qarashli ko‘p tarmoqli markaziy poliklinikaning aholiga bepul beriladigan dorilar bilan ta’minlanish holatini o‘rgandi.

🔻O‘rganish davomida poliklinikada aholiga belgilangan tartibda bepul berilishi nazarda tutilgan dori vositalarining ro‘yxati, mavjud zaxirasi hamda ularni fuqarolarga berish tartibi ko‘rib chiqildi. Shuningdek, dorilarning amaldagi ehtiyojdan kelib chiqqan holda mavjudligi va ularni saqlash sharoitlariga e’tibor qaratildi.

🔻Ma’lum bo‘lishicha, tibbiyot muassasasida aholi uchun bepul beriladigan dori vositalari yetarli miqdorda shakllantirilgan bo‘lib, mavjud zaxira aholi ehtiyojini ta’minlashga xizmat qilmoqda. Dori vositalarini saqlash jarayoni ham belgilangan talablar asosida tashkil etilgan.

🔻Xususan, dori vositalari saqlanadigan joylarda ularning sifati va yaroqlilik holatiga ta’sir ko‘rsatishi mumkin bo‘lgan omillarning oldini olishga e’tibor qaratilgan. Dorilarni hisobga olish, saqlash va aholiga berish jarayonlarini tartibli tashkil etish bo‘yicha zarur sharoitlar yaratilgan.

🔻Deputat tomonidan aholiga ko‘rsatilayotgan tibbiy xizmatlar sifatini oshirish, bepul dori vositalari ta’minotida uzilishlarga yo‘l qo‘ymaslik va mavjud zaxiralarni doimiy monitoring qilib borish bo‘yicha mas’ullarga tavsiyalar berildi.