Navbatdagi o‘rganish Xalq deputatlari Marg‘ilon shahar Kengashi kotibiyat bosh mutaxassisi N. Akbarova hamda “Korrupsiyaga qarshi kurashish va xavfsizlik masalalari” doimiy komissiyasi raisi X.Abdurahmonov tomonidan 2-Saxovat saylov okrugi deputati S. Azizov hududidagi Ipakchi mahallasida olib borildi.

O‘rganish davomida mahallada faoliyat yuritayotgan ijtimoiy xodim O‘.Meliqo‘ziyeva tomonidan aholini ijtimoiy qo‘llab-quvvatlash, ehtiyojmand oilalar bilan ishlash hamda nogironligi bo‘lgan shaxslarning huquqlarini ta’minlash borasida amalga oshirilayotgan ishlar tahlil qilindi.

Ma’lumotlarga ko‘ra, Ipakchi mahallasida 3900 nafar aholi, 1134 ta oila va 1004 ta xonadon mavjud. Hozirgi kunda 97 nafar fuqaro ijtimoiy reyestrga kiritilgan bo‘lib, shundan 25 nafari davlat ta’minotida, 58 nafari kambag‘al oilalar reyestrida, 14 nafari esa kambag‘allik chegarasidagi oilalar hisoblanadi. Shuningdek, “Saxovat va ko‘mak ” jamg‘armasi mablag‘lari doirasida 3 ta xonadonda ta’mirlash ishlari amalga oshirilgan.Xususan Ipakchi mahallasi, Bog‘chasaroy ko‘chasi, 19/10–13–14-uyda istiqomat qiluvchi I-guruh nogironi B.Xolmatovning xonadonida ham ta’mirlash ishlari amalga oshirilgan va fuqaro uchun qulay sharoitlar yaratilgan.

Mazkur o‘rganishlar davomida O‘zbekiston Respublikasining 2020-yil 15-oktabrdagi O‘RQ–641-son “Nogironligi bo‘lgan shaxslarning huquqlari to‘g‘risida”gi Qonuni ijrosiga alohida e’tibor qaratildi.

Xususan, Qonunning:
- 4-moddasida belgilangan nogironligi bo‘lgan shaxslarning qadr-qimmatini hurmat qilish, kamsitishga yo‘l qo‘ymaslik va teng imkoniyatlar yaratish prinsiplari;
- 7-moddasida nazarda tutilgan nogironligi bo‘lgan shaxslar uchun ijtimoiy, iqtisodiy va tibbiy xizmatlardan teng foydalanish imkoniyatlarini ta’minlash;
- 9-moddasida belgilangan obyektlar va xizmatlarning qulayligini yaratish, turar joylar hamda infratuzilma obyektlarini nogironligi bo‘lgan shaxslar ehtiyojlariga moslashtirish;
- 10-moddasida ko‘rsatilgan nogironligi bo‘lgan shaxslarni jamiyat va davlat hayotiga keng jalb etish talablarining ijrosi yuzasidan amalga oshirilayotgan ishlar tahlil qilindi.

Shuningdek, mahallada nogironligi bo‘lgan fuqarolar va ehtiyojmand oilalarni ijtimoiy qo‘llab-quvvatlash, ularning yashash sharoitlarini yaxshilash, uy-joylarni moslashtirish hamda zarur yordam ko‘rsatish bo‘yicha olib borilayotgan ishlar deputatlik nazorati asosida o‘rganildi.

O‘rganish yakunida aniqlangan masalalar yuzasidan tegishli mutasaddilarga tavsiyalar berilib, qonun hujjatlarida belgilangan vazifalar ijrosini ta’minlash hamda nogironligi bo‘lgan shaxslarning huquq va manfaatlarini himoya qilish borasidagi ishlarni yanada kuchaytirish lozimligi ta’kidlandi.

Xalq deputatlari Marg‘ilon shahar Kengashi tomonidan “Nogironligi bo‘lgan shaxslarning huquqlari to‘g‘risida”gi Qonun ijrosi va ehtiyojmand fuqarolarni qo‘llab-quvvatlash masalalari deputatlik nazoratida bo‘lib qoladi.