Ámelge asırılıp atırǵan jumıslardı qadaǵalaw maqsetinde, Xalıq deputatarı Bozataw rayonlıq Keńesi 3-sanlı “Mádeniyat” saylaw okruginen (ÓzXDP) saylanǵan deputat G.Yusupova hám Keńes sekretariat bas qánegesi S.Alimov penen birgelikte óz okrugi aymaǵındaǵı “A.Dosnazarov” kóshesinde jańadan qurılıp atırǵan piyadalar jolı qurılısı menen jaqınnan tanıstı.

Maǵlıwmat ornında aytıp ótiw orınlı, Ózbekstan Respublikası Prezidentiniń 2026-jıl 5-fevraldaǵı PQ-49-sanlı qararı hám usı tiykardaǵı Qaraqalpaqstan Respublikası Joqarǵı Keńesi Prezidiumınıń 2026-jıl 6-marttaǵı 617-sanlı qararı menen Bozataw rayonın rawajlandırıw baǵdarlamaları ushın ajıratılǵan qarjılar esabınan “Bozataw” PPJ aymaǵındaǵı “A.Dosnazarov” kóshesiniń 300 m aralıǵına jańadan piyadalar jolın qurıw belgilengen.

Deputatlar usı aymaqta ámelge asırılıp atırǵan piyadalar jolınıń qurılıs jumısları menen jaqınnan tanısıp, qurılısshılar menen pikirlesti. Ushırasıw dawamında alıp barılıp atırǵan jumıslardıń barısı, sapası hám belgilengen múddetlerde juwmaqlanıwı máselelerine ayrıqsha itibar qaratıldı.

Sonday-aq, bul piyadalar jolınıń paydalanıwǵa tapsırılıwı xalıq ushın qáwipsiz háreketleniwdi támiyinlew, aymaq infrastrukturasın jáne de jaqsılaw hám abadanlastırıw jumıslarına múnásip úles qosadı.