Deputat mahalladagi ijtimoiy xodim faoliyatini o‘rgandi 

 Mamlakatimizda ijtimoiy himoyaga muhtoj qatlamlarni
qo‘llab-quvvatlash, ularning huquq va manfaatlarini himoya qilish davlat siyosatining
eng muhim yo‘nalishlaridan biri bo‘lib qolmoqda. Bu borada qabul qilingan O‘zbekiston
Respublikasining “Keksalar, nogironligi bo‘lgan shaxslar va aholining boshqa ijtimoiy
ehtiyojmand toifalari uchun ijtimoiy xizmatlar to‘g‘risida”gi (O‘RQ-415) hamda
“Nogironligi bo‘lgan shaxslarning huquqlari to‘g‘risida”gi (O‘RQ-641) qonunlari
ijrosini ta’minlash maqsadida joylarda tizimli o‘rganishlar olib borilmoqda. 

Xususan, Xalq deputatlari Ohangaron
tuman Kengashi deputati, 12-Sanam saylov okrugi vakili Rustam Abdullaev tomonidan
"Sanam" MFY hududida faoliyat yuritayotgan ijtimoiy xodim Orif Jumanazarovning
ish faoliyati atroflicha o‘rganildi. 

O‘rganish davomida deputat mahalladagi
ijtimoiy himoyaga muhtoj qatlam bilan ishlash, kam ta’minlangan va ehtiyojmand oilalarni
qo‘llab-quvvatlash borasidagi joriy holat bilan yaqindan tanishdi. Shuningdek, fuqarolar
murojaatlari bilan ishlashning shaffofligi va tezkorligi tahlil qilindi. 

Muhokama markazida bo‘lgan asosiy masalalar
oilalarning ijtimoiy-iqtisodiy holatini xonadonbay o‘rganish, davlat ijtimoiy dasturlari
doirasida ko‘rsatilayotgan yordamlarning manzilliligi, ehtiyojmand fuqarolarning
bandligini ta’minlash va ularni kasb-hunarga o‘qitishdan iborat bo‘ldi. 

Deputat Rustam Abdullaev ijtimoiy xodim
faoliyatini ko‘zdan kechirar ekan, asosiy e’tiborni fuqarolarning hayot sifatini
yaxshilash va ular uchun doimiy daromad manbaini shakllantirishga qaratdi. O‘rganish
jarayonida mavjud muammolarni tizimli hal etish yuzasidan ijtimoiy xodimga tegishli
taklif va tavsiyalar berildi. 

"Ijtimoiy xodimning faoliyati
— bu shunchaki ro‘yxat bilan ishlash emas, balki har bir inson taqdiriga mas’ullikdir.
Qonunlarimizda belgilangan imtiyoz va xizmatlar unga ehtiyoji bor har bir fuqaroga
yetib borishi shart," — deb ta’kidladi xalq vakili. 

Mazkur o‘rganish ishlari "Sanam"
mahallasida ijtimoiy muhofaza tizimini yanada takomillashtirishga, aholi farovonligini
oshirishga va fuqarolarning qonuniy huquqlarini to‘laqonli ta’minlashga xizmat qiladi.