Xalq deputatlari Marg‘ilon shahar Kengashi deputati M.Abdurahmonova tomonidan 25-Orolbo‘yi saylov okrugidagi “Mashad” mahallasida kambag‘allikni qisqartirish, aholi bandligini ta’minlash hamda oilalar daromadini oshirish bo‘yicha mahallabay va xonadonbay o‘rganish ishlari olib borildi.

Barqaror ish oʻrinlarini yaratish, bandlikni taʼminlash orqali aholining doimiy daromad manbaini yaratish hamda kambagʻallikni kamaytirish boʻyicha mahalliy Kengashlar tomonidan deputatlik nazoratini amalga oshirish yuzasidan
mahalla fuqarolar yigʻinida mahalla yettiligi, nuroniylar va otinoyilardan iborat ishchi guruh tuzilib, xonadonlardagi mavjud holat va muammolar manzilli o‘rganildi.

Jarayon davomida ishsiz fuqarolarni aniqlash, ularni doimiy va barqaror daromad manbai bilan ta’minlash, mavjud bo‘sh ish o‘rinlariga yo‘naltirish hamda kasb-hunarga o‘qitish masalalariga alohida e’tibor qaratildi.

Shuningdek, tadbirkorlik faoliyatini boshlash istagidagi fuqarolarning imkoniyatlari o‘rganilib, ularni imtiyozli kredit va boshqa qo‘llab-quvvatlash mexanizmlaridan foydalanishga yo‘naltirish, tomorqadan samarali foydalanish orqali qo‘shimcha daromad manbalarini yaratish bo‘yicha takliflar bildirildi.

O‘rganish yakunlari bo‘yicha aniqlangan muammolarni bartaraf etish, ishsiz fuqarolar bandligini ta’minlash va oilalar daromadini oshirishga qaratilgan vazifalar belgilab olindi. Ularning ijrosi deputatlik nazoratiga olindi.