«Eng muhim 24 ta yo‘nalish»ning 5-bandi ijrosini ta’minlash maqsadida mahallalarda aholining ijtimoiy himoyasini kuchaytirish, ijtimoiy ehtiyojmand fuqarolarni qo‘llab-quvvatlash hamda kam ta’minlangan oilalarga ko‘rsatilayotgan xizmatlar sifatini oshirish bo‘yicha o‘rganish ishlari olib borilmoqda.

Shu munosabat bilan Xalq deputatlari Chilonzor tumani Kengashi deputati, O‘zbekiston Xalq demokratik partiyasi a’zosi Mahmudova Donoxon Artikovna tomonidan Charx Kamolon-3 mahallasida belgilangan vazifalar ijrosi yuzasidan o‘rganish ishlari amalga oshirildi.

O‘rganish davomida mahalladagi ijtimoiy xodimning faoliyati, aholining ijtimoiy ehtiyojmand qatlamlariga ko‘rsatilayotgan xizmatlar samaradorligi hamda kam ta’minlangan oilalarni ijtimoiy qo‘llab-quvvatlash mexanizmlari ko‘rib chiqildi.

Jumladan, quyidagi yo‘nalishlarga alohida e’tibor qaratildi:

Ijtimoiy himoyaga muhtoj fuqarolarni aniqlash va ularning ehtiyojlarini o‘rganish;

Kam ta’minlangan oilalarga ijtimoiy nafaqalar va moddiy yordam tayinlash hamda to‘lash jarayonlari;

Ijtimoiy xizmatlarning manzilliligi, shaffofligi va qonuniyligi;

Fuqarolarning murojaatlarini o‘z vaqtida ko‘rib chiqish va amaliy yordam ko‘rsatish;

Ijtimoiy xodim tomonidan aholiga ko‘rsatilayotgan xizmatlar sifatini oshirish.

O‘rganish yakunlari bo‘yicha aholining ijtimoiy himoyasini yanada kuchaytirish, ijtimoiy xizmatlardan foydalanish imkoniyatlarini kengaytirish hamda aniqlangan masalalar yuzasidan tegishli chora-tadbirlarni amalga oshirishga e’tibor qaratildi.

Inson qadri, uning huquq va manfaatlarini ta’minlash — deputatlik faoliyatining muhim yo‘nalishlaridan biridir.