Termiz shahrida ta’lim muassasalarida o‘quvchilar uchun yaratilgan sharoitlarni yaxshilash, ta’lim-tarbiya sifatini oshirish hamda yoshlar o‘rtasida kitobxonlik madaniyatini rivojlantirish borasidagi ishlar deputatlik nazorati doirasida izchil o‘rganilmoqda.

Xalq deputatlari Surxondaryo viloyati Kengashi deputati S.Abduraimov hamda xalq deputatlari Termiz shahar Kengashi deputati A.Karimov Termiz shahridagi 15-sonli umumiy o‘rta ta’lim maktabida bo‘lib, ta’lim muassasasidagi sharoitlar hamda o‘quv-tarbiya jarayonlari bilan yaqindan tanishdilar.

O‘rganish ishlari mahalliy Kengash deputatlari faoliyatining “24 ta eng muhim yo‘nalish” mezonlaridan kelib chiqib tashkil etildi. Unda ta’lim muassasasidagi ma’naviy-ma’rifiy muhit, o‘quvchilar uchun yaratilgan sharoitlar va tarbiyaviy ishlarning samaradorligiga e’tibor qaratildi.

Xususan, “Tarbiya” fanining o‘qitilishi, uning o‘quvchilar dunyoqarashi, milliy va umuminsoniy qadriyatlarni shakllantirishdagi o‘rni o‘rganildi. Shuningdek, maktab kutubxonasi faoliyati, kitob fondi, o‘quvchilar uchun yaratilgan sharoitlar hamda yoshlar o‘rtasida kitobxonlik madaniyatini yuksaltirish borasidagi ishlar bilan tanishildi.

O‘rganish yakunlari bo‘yicha aniqlangan masalalarni bartaraf etish, ta’lim va tarbiya sifatini yanada oshirish hamda o‘quvchilar uchun yaratilgan sharoitlarni yaxshilash yuzasidan tegishli taklif va tavsiyalar bildirildi.