ЯНГИҚЎРҒОНДА КАМБАҒАЛЛИКНИ ҚИСҚАРТИРИШ БЎЙИЧА МАНЗИЛЛИ ЎРГАНИШЛАР ОЛИБ БОРИЛДИ
Ўзбекистон Республикаси Вазирлар Маҳкамаси ҳузуридаги Енгил саноатни ривожлантириш агентлиги директори Нозимжон Холмуродов ҳамда вилоят ҳокимининг биринчи ўринбосари Зуҳриддин Баҳриддинов бошчилигида Янгиқўрғон туманида камбағалликни қисқартириш, аҳоли бандлигини таъминлаш ва оилаларнинг даромад манбаларини кенгайтириш бўйича ўрганиш ишлари олиб борилди.
Ўрганишларда Янгиқўрғон туман хокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович ҳам иштирок этиб, ўзи сайланган округ ҳудудидаги «Обод» ва «Қутлуғтол» маҳаллаларида хонадонбай ишлаш тизими асосида аҳолининг ижтимоий-иқтисодий ҳолати, мавжуд имкониятлари ва салоҳияти билан танишди.
Камбағалликка тушиб қолган ҳамда камбағалликдан чиқариш имконияти мавжуд бўлган оилалар билан манзилли ишлашга алоҳида эътибор қаратилди. Фуқароларнинг қизиқиши ва қобилиятидан келиб чиқиб, уларни касб-ҳунарга ўқитиш, доимий ва мавсумий иш ўринларига жойлаштириш, тадбиркорликка жалб этиш ҳамда барқарор даромад манбаларини яратиш бўйича тегишли чора-тадбирлар белгилаб олинди.
Шунингдек, масъуллар «MIRANZA HOME TEXTILE» МЧЖ фаолияти билан танишиб, корхонанинг ишлаб чиқариш қуввати, мавжуд иш ўринлари, меҳнат шароитлари ҳамда келгусида фаолиятини кенгайтириш имкониятларини ўргандилар.
Ўрганишлар якунида аниқланган масалаларни ҳал этиш, эҳтиёжманд оилаларни қўллаб-қувватлаш ва уларнинг бандлигини таъминлаш юзасидан масъулларга тегишли вазифалар белгилаб берилди.