Tadbirda o‘quvchilar, o‘qituvchilar va ota-onalarga O‘zbekiston Respublikasi Prezidentining yangi o‘quv yili munosabati bilan yo‘llagan tabrigi o‘qib eshittirildi. Yangi o‘quv yilida 1-sinfga qabul qilingan o‘quvchilar sinflarga taqsimlandi.
Tadbir davomida xalq deputatlari Sardoba tuman Kengashi kotibiyat mudiri Q.O'tayev tomonidan maktab kutubxonasiga 45 dona kitob sovg‘a qilindi. Kitoblar o‘quvchilarning bilim va dunyoqarashini oshirish, mutolaa madaniyatini rivojlantirishga xizmat qilishi ta’kidlandi.
Deputat tomonidan maktabning yangi o‘quv yiliga tayyorgarlik holati ham o‘rganildi. Xususan, sinf xonalari va sport zalining holati, tozalik va obodonlashtirish ishlari ko‘zdan kechirildi.
O‘rganish davomida ayrim sinf xonalari va sport zalida tozalash ishlari yetarli darajada amalga oshirilmagani, jihozlar va boshqa yuzalarda chang qolganligi aniqlandi.
Shuningdek, “Bilimlar kuni” tadbirining tashkil etilishi va bezatilishida ayrim kamchiliklar kuzatildi. Deputat tomonidan maktab rahbariyatiga aniqlangan kamchiliklarni bartaraf etish, ta’lim muassasasida o‘quvchilar uchun munosib shart-sharoitlarni yaratish yuzasidan tegishli tavsiyalar berildi.
Tashrif davomida 10-sinflarda o‘tkazilgan “Mustaqillik darsi” mashg‘ulotlari ham kuzatildi. Darslarda o‘quvchilarga O‘zbekiston davlat mustaqilligining tarixiy ahamiyati, milliy qadriyatlar va Vatanga sadoqat haqida tushunchalar berildi.
Xalq deputatlari Sardoba tuman Kengashi kotibiyat mudiri Q.O'tayev ta’lim muassasalaridagi shart-sharoitlar, o‘quvchilarning ta’lim olishi uchun yaratilgan imkoniyatlar bilan yaqindan tanishdi.