Xalq deputatlari Chilonzor tumani Kengashi deputati Sultanov Baxodir Turg‘unovich tomonidan Chilonzor tumani hokimining qurilish, to‘siqlarsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari K. Xamraev nomiga yuborilgan deputat so‘rovi yuzasidan rasmiy javob olindi.
Javob xatida ma’lum qilinishicha, Chilonzor tumani hokimligi tomonidan 2026-yilda ko‘p qavatli uylar oldi hududlarini asfalt qoplamasi bilan ta’mirlash bo‘yicha chora-tadbirlar rejasi shakllantirilgan.
Shuningdek, 1-Katta Chilonzor mahallasida asfaltlash ishlarini amalga oshirish bo‘yicha manzilli ro‘yxat dasturi tasdiqlangach, belgilangan tartibda zarur mablag‘lar ajratilishi va shundan so‘ng qurilish-ta’mirlash ishlari boshlanishi bildirilgan.
Bundan tashqari, mazkur masala yuzasidan manzilli ro‘yxat dasturi tasdiqlangandan so‘ng qo‘shimcha ma’lumotlar taqdim etilishi qayd etilgan.
Xalq deputatlari Chilonzor tumani Kengashi deputati tomonidan saylovchilar murojaatlari asosida ko‘tarilgan ushbu masala deputat nazoratida bo‘lib, asfaltlash ishlari yuzasidan olib borilayotgan jarayonlar yuzasidan jamoatchilik muntazam ravishda xabardor qilib boriladi.