Ózbekstan Respublikası Oliy Majlisi Nızamshılıq palatası deputatı (ÓzLiDeP) B. Aldamuratov, rayonlıq Keńesi sekretariatı baslıǵı A. Ibragimov, hám ÓzLiDeP rayonlıq Keńesi apparat baslıǵı B.Qutlımuratovlar “Aspantay” APJ “Porlıtaw” elatı aymaǵınan ótip turǵan Ámiwdárya dáryasına ponton kópirin kózden ótkerdi. 

Húrmetli Prezidentimizdiń tapsırması tiykarında Bozataw rayonın hám arqa rayonlardı tikkeley Qońırat rayonı menen baylanıstırıw maqsetinde ponton kópirin ornatıw boyınsha jumıslar
tabıslı ámelge asırıldı. 

Qısqa waqıt ishinde alıp barılǵan qurılıs jumısları nátiyjesinde “Aspantay” APJ “Porlıtaw” elatı aymaǵınan ótip turǵan Ámiwdárya dáryasına ponton kópiri qurılıp, paydalanıwǵa tapsırıldı. 

Bul iri infrastrukturalıq joybar arqalı Bozataw rayonı menen Qońırat rayonı ortasındaǵı kópir iske túsip, xalıqtıń qatnawı hám transport jolları qısqardı. Sonday-aq, bul kópir ekonomikalıq baylanıslardı jaqsılaw, sawda-sattıq hám xalıqtıń kúndelikli turmısına qolaylıqlar jaratıwǵa úlken úles qosadı.
Prezidentimizdiń xalıq mápi ushın alıp barıp atırǵan siyasatı nátiyjesinde rayonda iri infrastrukturalıq joybarlar izbe-iz ámelge asırılıp, eldiń turmıs sapası jánede jaqsılanbaqta.