Xalq deputatlari Ishtixon tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasining navbatdagi yig‘ilishi bo‘lib o‘tdi.

Kun tartibiga muvofiq, Kengashning 2026-yilga mo‘ljallangan ish rejasining 30-bandiga asosan “Yoshlarga oid davlat siyosati to‘g‘risida”gi Qonunning ijrosi yuzasidan tumanda amalga oshirilayotgan ishlar to‘g‘risida ma’lumot eshitildi.

Qayd etilishicha, 62 ta mahallada o‘tkazilgan xatlov natijasida 72 190 nafar yoshlar qamrab olinib, “Yoshlar balansi” shakllantirildi. Ushbu tizim asosida aniqlangan 778 nafar ishsiz yoshlarning 775 nafari (99,6 foiz) bandligi ta’minlandi. Shuningdek, mehnat bozoriga yangi kirib kelgan 4 427 nafar yoshlarning 94,7 foizi ish bilan ta’minlangan.

Yoshlar bandligini oshirish maqsadida 1 643 nafar yoshlarga 633 gektar yer ajratilib, ular tomonidan 2,3 ming tonna mahsulot yetishtirilib, 3,4 mlrd so‘m daromad olingan. Yoshlar tadbirkorligini qo‘llab-quvvatlash, imtiyozli kreditlar ajratish hamda “Biznes marafon” kabi loyihalar orqali ularning faolligi oshirilmoqda.

Shuningdek, ijtimoiy himoyaga muhtoj va tarbiyasi og‘ir 261 nafar yoshlar mas’ul rahbarlarga biriktirilib, ular bilan manzilli ishlar olib borilmoqda. “Yoshlar daftari” orqali 939 nafar yosh ro‘yxatga olinib, 844 nafariga amaliy yordam ko‘rsatildi.

Yoshlarning bo‘sh vaqtini mazmunli tashkil etish maqsadida o‘tkazilgan sport, madaniyat va intellektual tadbirlarda, jumladan “Besh tashabbus olimpiadasi”da 102 ming nafardan ortiq yoshlar ishtirok etdi.

Ma’lumotda 2026-yilda yoshlar bandligini ta’minlash, ularni kasb-hunar va xorijiy tillarga o‘qitish, bo‘sh vaqtini samarali tashkil etish hamda harbiy-vatanparvarlik ruhida tarbiyalash yo‘nalishlari ustuvor vazifa sifatida belgilab olindi.

Yig‘ilish yakunida komissiya a’zolari tomonidan sohaga oid ishlarni yanada takomillashtirish yuzasidan tegishli tavsiyalar berilib, mazkur masalani Kengash sessiyasi kun tartibiga kiritish taklifi ilgari surildi.