Termiz shahri 2026-yil 14–16-avgustda o‘tkazilgan “O‘zbekiston – Xitoy” xalqaro investitsiya forumi orqali xalqaro hamkorlik va investitsiyalar markaziga aylanmoqda. Forumda 10 milliard dollarlik 95 ta loyiha taqdim etilib, 6 milliard 253,5 million dollarlik 63 ta loyisha bo‘yicha dastlabki kelishuvlarga erishilgan.

• Aholisi uchun zamonaviy kasb-hunar maktabi va obodonlashtirish tizimini rivojlantirish loyihalari.

• Xitoy kompaniyalari bilan hamkorlikda Termizda “Aqlli shahar” (Smart City) tizimini joriy etish.

• To‘g‘ridan-to‘g‘ri xorijiy investitsiyalarni jalb etish orqali ishlab chiqarish va innovatsion tarmoqlarni rivojlantirish.

O‘zbekiston Respublikasi davlat mustaqilligining 35 yilligi nishonlanayotgan bugungi kunlarda mamlakatimizda amalga oshirilayotgan keng ko‘lamli islohotlar, ochiq va pragmatik tashqi siyosat, investitsiyaviy muhitni yanada yaxshilash borasidagi sa’y-harakatlar o‘zining amaliy natijalarini bermoqda. Ayniqsa, hududlarning xalqaro aloqalarini kengaytirish, xorijiy investorlar bilan samarali hamkorlikni yo‘lga qo‘yish va zamonaviy loyihalarni hayotga tatbiq etish iqtisodiy taraqqiyotning muhim omiliga aylanmoqda.

Ana shunday jarayonlarda qadimiy va strategik jihatdan muhim shahar — Termizning ham xalqaro maydondagi o‘rni tobora mustahkamlanib bormoqda. Shaharning qulay geografik joylashuvi, transport-logistika imkoniyatlari, savdo-iqtisodiy salohiyati hamda Afg‘oniston va boshqa davlatlar bilan chegaradosh hudud sifatidagi strategik ahamiyati xorijiy hamkorlar e’tiborini jalb etmoqda.

Buning yorqin misoli sifatida Termiz shahrida 14–16-avgust kunlari o‘tkazilgan “O‘zbekiston – Xitoy” xalqaro investitsiya forumini alohida ta’kidlash mumkin. Nufuzli tadbirda Xitoyning 120 dan ortiq kompaniyasidan 350 nafardan ziyod hamda Afg‘onistonning 46 ta kompaniyasidan 100 dan ortiq vakil ishtirok etdi.

Forum doirasida Surxondaryoning investitsiyaviy salohiyati keng namoyish etilib, umumiy qiymati 10 milliard dollarlik 95 ta investitsiya loyihasi xorijiy ishbilarmon doiralariga taklif qilindi. B2B va G2B formatlarida o‘tkazilgan muzokaralar natijasida esa 63 ta investitsiya loyihasi bo‘yicha umumiy qiymati 6 milliard 253,5 million dollarlik dastlabki kelishuvlarga erishildi.

Mazkur kelishuvlar qurilish materiallari, to‘qimachilik, tog‘-kon sanoati, xizmatlar va turizm, qishloq xo‘jaligi, neft-gaz, kimyo, elektrotexnika, mashinasozlik kabi ko‘plab istiqbolli yo‘nalishlarni qamrab olgani bilan ahamiyatlidir. Bu esa viloyat, xususan, Termiz shahrining yangi investitsiyaviy imkoniyatlarini ochib, zamonaviy ishlab chiqarish va xizmat ko‘rsatish tarmoqlarini rivojlantirish uchun mustahkam zamin yaratadi.

Forum doirasida “Ayritom” erkin savdo zonasida “Made in Uzbekistan” ko‘rgazmasining tashkil etilgani ham mahalliy korxonalarning ishlab chiqarish va eksport salohiyatini xalqaro hamjamiyatga namoyish etish imkonini berdi.

Tadbirning tantanali ochilish marosimida namoyish etilgan videorolik orqali Surxon vohasining boy tarixi, strategik joylashuvi va ulkan iqtisodiy salohiyati xorijiy mehmonlarga taqdim etildi. Unda hududning sanoat, qishloq xo‘jaligi, logistika va turizm sohalaridagi imkoniyatlari, investorlar uchun yaratilayotgan qulay sharoitlar hamda xalqaro hamkorlar bilan amalga oshirilayotgan yirik loyihalar o‘z ifodasini topdi.

Eng muhimi, forumda erishilgan kelishuvlar qog‘ozdagi reja bo‘lib qolmay, bugungi kunda amaliy bosqichga o‘tmoqda. Jumladan, Termiz shahar hokimi Sharofiddin Usanov boshchiligidagi ishchi guruh Xitoyning nufuzli kompaniyalari vakillari bilan navbatdagi amaliy muzokaralarni o‘tkazib, shaharda uchta yirik loyihani jadallashtirish bo‘yicha aniq kelishuvlarga erishdi.

Xususan, Xitoyning “Anhui Fengyuan Equipment Technology Co. Ltd” kompaniyasi bilan Termiz shahrida obodonlashtirish tizimini davlat-xususiy sheriklik asosida zamonaviy talablar darajasida tashkil etish hamda Xitoy tajribasi asosida zamonaviy kasb-hunar maktabini tashkil etish rejalashtirilmoqda.

Kasb-hunar maktabida avtomobilsozlik, robototexnika va avtomatlashtirish, innovatsion texnologiyalar, xizmat ko‘rsatish hamda mexanik ishlov berish kabi zamonaviy yo‘nalishlarda mutaxassislar tayyorlash ko‘zda tutilgani ayniqsa e’tiborlidir. Bu loyiha yoshlarning zamonaviy kasblarni egallashi, mehnat bozorida raqobatbardoshligini oshirishi va yangi ish o‘rinlari yaratilishiga xizmat qiladi.

Yana bir muhim loyiha Xitoyning “Tranalytic International Limited Co. Ltd” kompaniyasi bilan hamkorlikda Termiz shahrida “Aqlli shahar” (Smart City) tizimini bosqichma-bosqich joriy etishga qaratilgan. Shaharning turli sohalarini raqamlashtirish, zamonaviy texnologiyalarni keng tatbiq etish va boshqaruv jarayonlarini yanada samarali tashkil etish kelgusida Termizning zamonaviy va innovatsion shahar sifatidagi qiyofasini shakllantirishga xizmat qiladi.

Loyihalarni hayotga tatbiq etish jarayonida puxta biznes-rejalar ishlab chiqish, malakali mutaxassislarni jalb etish, Xitoydan sohaga ixtisoslashgan ekspertlarni yuborish hamda shartnoma shartlarini milliy qonunchilikka moslashtirish bo‘yicha ham kelishuvlarga erishilgani hamkorlikning amaliy va uzoq muddatli xususiyatga ega ekanini ko‘rsatmoqda. Loyihalarni moliyalashtirish uchun to‘g‘ridan-to‘g‘ri xorijiy investitsiyalarni jalb etish rejalashtirilayotgani esa ularning barqaror amalga oshirilishi uchun muhim omildir.

Bugun Termizda kuzatilayotgan bu jarayonlar shahar taraqqiyotining yangi bosqichini boshlab bermoqda. Xalqaro hamkorlikning kengayishi, xorijiy investitsiyalarning kirib kelishi, zamonaviy texnologiyalarning joriy etilishi va yangi loyihalarning amalga oshirilishi shaharning iqtisodiy salohiyatini oshirish bilan birga, aholining farovonligini ta’minlashga ham xizmat qiladi.

Mustaqilligimizning 35 yilligi arafasida Termiz shahrida amalga oshirilayotgan bunday keng ko‘lamli ishlar mamlakatimizda yaratilgan tinchlik, barqarorlik va investitsiyaviy muhitning amaliy samaralarini namoyon etmoqda. Eng muhimi, Termiz nafaqat tarixiy va strategik shahar, balki xalqaro hamkorlik, investitsiya, innovatsiya va zamonaviy loyihalar uchun yangi imkoniyatlar maskaniga aylanib bormoqda.

Bu esa Surxon vohasining ulkan salohiyatini xalqaro maydonda yanada keng namoyon etish, xorijiy hamkorlar bilan o‘zaro manfaatli aloqalarni mustahkamlash va Termizning kelajakdagi taraqqiyotini yangi bosqichga olib chiqish uchun muhim poydevor bo‘lib xizmat qiladi.