Mahalla boshqaruvini samarali tashkil etish, “mahalla yettiligi” va faollarning mas’uliyatini oshirish hamda aholi muammolariga eng quyi bo‘g‘inda manzilli yechim topish — deputatlik korpusining doimiy diqqat-markazida!

Xalq deputatlari Termiz shahar Kengashi raisi, deputat D.Normuradova, Kengash kotibiyati mudiri, deputat A.Ashurov, 2-“Yulduz” saylov okrugi deputati I.Shatova hamda Kengash kotibiyati bosh mutaxassisi A.Temirovlar “Yulduz” mahallasida bo‘lib, mahalla faollari va mas’ullari ishtirokida atroflicha yig‘ilish va nazorat-tahlil tadbirini o‘tkazdilar.

O‘rganish va muhokamalar jarayoni quyidagi ikki muhim yo‘nalishga tayandi:

O‘zbekiston Respublikasi Prezidentining 2026-yil 24-iyundagi “Mahalla boshqaruvini samarali tashkil etishga oid qo‘shimcha chora-tadbirlar to‘g‘risida”gi PF–116-sonli Farmoni talablari;

Mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari.

Yig‘ilish davomida mahallasidagi amaliy ishlar va aholi bilan ishlash samaradorligi atroflicha ko‘rib chiqildi:

“Xonadonbay” ishlash: Aholi muammolarini bevosita xonadonlarga kirgan holda o‘rganish va murojaatlarga o‘z vaqtida yechim topish;

Ijtimoiy qo‘llab-quvvatlash: Ijtimoiy himoyaga muhtoj oilalarga amaliy ko‘mak berish, aholi bandligini ta’minlash hamda tadbirkorlikni rivojlantirish;

Yoshlar va xotin-qizlar: Hududdagi yoshlar hamda xotin-qizlar bilan ishlash, ularning muammolarini tizimli hal etish;

Obodonlashtirish va infratuzilma: Mahalla ko‘chalarini obod qilish va kommunal sohadagi kamchiliklarni bartaraf etish.

Yig‘ilishda mahalla faollari tomonidan hududda uchrayotgan bir qator tizimli muammolar va aholi takliflari o‘rtaga tashlandi.

Aniqlangan masalalar deputatlar tomonidan nazoratga olindi. Vakolatli idoralar aralashuvini talab etadigan murakkab muammolar bo‘yicha tegishli mutasaddi tashkilotlarga deputatlik so‘rovlari yuborilishi va natijasi bo‘yicha mahalla ahli xabardor qilinishi belgilandi.

Yakunda mahalla faoliyatini yanada takomillashtirish hamda aniqlangan kamchiliklarni bartaraf etish yuzasidan aniq tavsiya va topshiriqlar berildi.