Xalq deputatlari Termiz shahar Kengashining 2-“Yulduz” saylov okrugida o‘tkazilgan nazorat-tahlil tadbirlari davomida “Yulduz” mahallasidagi Ibn Sino ko‘chasi yo‘l yoqasida joylashgan ariqda maishiy va boshqa chiqindilar to‘planib qolgani aniqlandi.

Mazkur holat ariqning suv o‘tkazuvchanligiga salbiy ta’sir ko‘rsatishi, shuningdek, hududda antisanitariya holatini yuzaga keltirishi mumkinligi qayd etildi.

Aniqlangan muammoni bartaraf etish maqsadida Termiz shahar Obodonlashtirish boshqarmasi boshlig‘i A.Saribayevga deputat so‘rovi yuborilib, Ibn Sino ko‘chasi yo‘l yoqasidagi ariq va uning atrofini chiqindilardan tozalash hamda tegishli obodonlashtirish ishlarini amalga oshirish so‘raldi.

Shuningdek, ko‘rilgan choralar va amalga oshirilgan ishlar yuzasidan belgilangan tartibda yozma ma’lumot taqdim etish so‘raldi.

Deputatlik nazorati — aniqlangan muammolarni shunchaki qayd etish emas, balki ularning amaliy yechimini ta’minlashga qaratilgan muhim vositadir.