АҲОЛИ МУРОЖААТИ ДЕПУТАТ НАЗОРАТИДА: ЭЛЕКТР ТАЪМИНОТИ БЎЙИЧА ДЕПУТАТЛИК СЎРОВИ ЮБОРИЛДИ
Халқ депутатлари Янгиқўрғон тумани Кенгаши депутати Юлдашев Ғолибжон Турғунпўлатович томонидан сайлов округида жойлашган Юқори Навкент маҳалла фуқаролар йиғинининг «Зафар» кўчаси аҳолиси томонидан билдирилган мурожаатлар атрофлича ўрганилди.
Ўрганишлар давомида мазкур кўчада яшовчи аҳолининг электр энергияси таъминоти билан боғлиқ муаммоси мавжудлиги маълум бўлди. Хусусан, ҳудудда электр таъминотини яхшилаш мақсадида зарур электр таянч устунлари ўрнатилган, бироқ ушбу устунларга электр тармоғи симларини тортиш ишлари ҳанузга қадар амалга оширилмагани аҳоли томонидан билдирилди.
Натижада хонадонларнинг электр таъминотини яхшилашга қаратилган ишлар тўлиқ якунланмай, аҳоли учун муайян ноқулайликлар сақланиб қолмоқда.
Фуқароларнинг ҳақли мурожаатидан келиб чиқиб, депутат Юлдашев Ғолибжон Турғунпўлатович мазкур масалани қонунчиликда белгиланган тартибда ҳал этиш, ўрнатилган электр таянч устунларига симларни тортиш ишларини тезлаштириш ҳамда аҳолини барқарор ва сифатли электр энергияси билан таъминлаш чораларини кўриш юзасидан Янгиқўрғон туман электр таъминоти корхонасига депутатлик сўрови юборди.
Депутатлик сўровида муаммони жойига чиққан ҳолда ўрганиш, зарур техник чора-тадбирларни белгилаш ва электр тармоғини тортиш ишларини қисқа муддатларда амалга ошириш масаласи кўтарилди.
📌 Аҳоли манфаатларини таъминлашга қаратилган мазкур депутатлик сўровининг ижроси депутат назоратига олинди.