Búgin Xalıq deputatları Bozataw rayonlıq Keńesi 1-sanlı «Palwash ataw» saylaw okruginen deputat, rayonlıq Keńes sekretariatı baslıǵı A. Ibragimov hám Ózbekstan Respublikası Oliy Majlisi Nızamshılıq palatası deputatı (ÓzLiDeP) B. Aldamuratov tárepinen rayonda ámelge asırılıp atırǵan qurılıs hám abadanlastırıw jumısları menen jaqınnan tanısıldı.
Úyreniw dawamında Ózbekstan Respublikası Prezidentiniń 2026-jıl 5-fevraldaǵı PQ–49-sanlı qararı hám Qaraqalpaqstan Respublikası Joqarǵı Keńesi Prezidiumınıń 2026-jıl 6-marttaǵı 617-sanlı qararı tiykarında ámelge asırılıp atırǵan Bozataw rayonın kompleksli rawajlandırıw baǵdarlaması sheńberindegi jumıslar kórip shıǵıldı.
Ásirese, rayon orayındaǵı 95V038 «Kazanketken awılı – Kókshiel elatı» avtomobil jolınıń 16,7 kilometrden 35 kilometrge shekem bolǵan 18,3 kilometrlik bólegin kapital ońlaw hám túngi jaqtılandırıw shıraǵın ornatıw jumısları baslanǵanı atap ótildi. Bul isler xalıqtıń qatnaw qolaylıǵın jaqsılaw, joldaǵı qáwipli jaǵdaylardı azaytıw hám rayon infrastrukturasın jáne de rawajlandırıwǵa qaratılǵan.
Deputatlar jumıslardıń orınlanıw barısı menen tanısıp, olardıń sapalı hám belgilengen múddette orınlanıwı boyınsha tiyisli usınısların bildirdi.
«Xalıqtıń razılıǵı – eń úlken baha. Jolı abat eldiń – kewli abat, turmısı rawan boladı. Usı iygilikli islerge úles qosıp atırǵan hár bir puqaraǵa hám qurıwshılarǵa xalıq atınan sheksiz minnetdarshılıq bildiremiz.» dedi deputatlarımız.