Deputat vakolatidan foydalandi: Tuman Kengashi deputati T.Ashurova mutasaddilarga so‘rov yubordi

Xalq deputatlari Uzun tumani Kengashi deputati Tamanno Ashurova tomonidan hududdagi aholini ko‘p yillardan buyon qiynab kelayotgan dolzarb muammolarni hal etish maqsadida tegishli mutasaddi tashkilot rahbarlariga rasmiy deputatlik so‘rovlari yuborildi.

Deputat tomonidan joylarga chiqib o‘rganilgan va tuman mas’ullari e’tiboriga havola etilgan 3 ta asosiy masala:
Yo‘l muammosi: Ta’mirtalab ko‘chalar
"Tojikobod" mahallasi tarkibidagi Mustaqillik, Navobod va Bahoriston ko‘chalari yo‘llarining yaroqsiz holga kelib qolgani aholi, ayniqsa, maktab o‘quvchilari va keksalar harakati uchun jiddiy qiyinchiliklar tug‘dirmoqda.

Uzun tumani hokimligi qoshidagi Obodonlashtirish boshqarmasi boshlig‘i v.b. F.Kenjayevga.

Mazkur ko‘chalarning qatnov qismini qayta ta’mirlash va aholi uchun xavfsiz harakatlanish sharoitini yaratish.

Eskirgan simyog‘ochlar xavfi
"Tojikobod" mahallasida mavjud elektr simyog‘ochlari (ustunlari) yillar davomida eskirib, chirigan, yorilgan va simlar osilib qolgan. Bu holat kuchli shamol va yomg‘irli kunlarda qisqa tutashuvlarga, elektr uzilishlariga va eng yomoni — yosh bolalar hayotiga jiddiy xavf solmoqda.

Uzun tumani Elektr tarmoqlari korxonasi boshlig‘i A.G‘afforovga.
Eskirgan yog‘och ustunlarni ko‘zdan kechirib, ularni zamonaviy temir-beton ustunlarga almashtirish hamda simlarni tartibga keltirish.

"Tojikobod" mahallasining Mustaqillik va Navobod ko‘chalarida yashovchi fuqarolar tomonidan markazlashgan ichimlik suvi tarmog‘i mavjud emasligi bo‘yicha takroriy murojaatlar kelib tushgan. Toza ichimlik suvi yo‘qligi aholining sanitariya-gigiyena holatiga va kundalik turmush tarziga juda salbiy ta’sir ko‘rsatmoqda.

"Surxondaryo suv ta’minoti" AJ Uzun tumani suv ta’minoti bo‘limi boshlig‘i I.Doniyorovga.

Ko‘chalarni toza ichimlik suvi bilan ta’minlash choralarini ko‘rish.

Qonuniy muddat va mas’uliyat:
"Xalq deputatlari viloyat, tuman va shahar Kengashi deputatining maqomi to‘g‘risida"gi Qonunga asosan, mutasaddi tashkilot rahbarlari ushbu so‘rovlarga 10 kundan kechiktirmay yozma ravishda javob berishlari shart.

Deputat so‘rovini e’tiborsiz qoldirish yoki qonuniy muddatlarni sababsiz buzish Ma’muriy javobgarlik to‘g‘risidagi kodeksning 193-moddasiga ko‘ra, mansabdor shaxslarga BHMning 3 baravaridan 7 baravarigacha jarima solishga sabab bo‘ladi.