Sharaf mahallasi 26-uy aholisi tomonidan mazkur ko‘p qavatli uydagi liftning texnik holati yuzasidan murojaat kelib tushdi. Murojaatda lift 1988-yilda foydalanishga topshirilgani, bugungi kunda esa texnik jihatdan keskin eskirgani, tez-tez nosoz holatga kelib qolayotgani hamda fuqarolar lift ichida qamalib qolayotgan holatlar kuzatilayotgani qayd etilgan. Shu munosabat bilan liftning texnik holatini o‘rganish, uni ta’mirlash yoki to‘liq almashtirish bo‘yicha mavjud rejalar hamda aholi xavfsizligini ta’minlash yuzasidan ko‘rilayotgan choralar haqida ma’lumot taqdim etish so‘raldi.

Shuningdek, Sharq mahallasi 21-uy 7–8-podyezdlar oralig‘idagi podvallarda olib borilgan tozalash ishlaridan so‘ng chiqindilar uzoq vaqt davomida olib chiqilmagani yuzasidan ham murojaat kelib tushgan. Mazkur holat hududning sanitariya holati yomonlashishiga, noxush hidlar tarqalishiga hamda aholi noroziligiga sabab bo‘layotgani bildirilgan. Ushbu masala yuzasidan hududni chiqindilardan tozalash, sanitariya-gigiyena talablariga rioya etilishini ta’minlash hamda mas’ul tashkilotlar faoliyatiga huquqiy baho berish yuzasidan deputatlik so‘rovi yuborildi.

Har ikki masala deputatlik nazoratiga olingan bo‘lib, mutasaddi tashkilotlardan qonunchilikda belgilangan tartibda yozma javob taqdim etilishi so‘ralgan.