Xalq deputatlari Termiz shahar Kengashi tomonidan fuqarolarning murojaatlarini joyiga chiqqan holda o‘rganish, mavjud muammolarga huquqiy baho berish va ularni bartaraf etish yuzasidan amaliy choralar ko‘rish ishlari izchil davom ettirilmoqda.

Shu doirada Kengash raisi, deputat D.Normuradova, Kengash kotibiyati mudiri, deputat A.Ashurov hamda kotibiyat bosh mutaxassisi R.Mamashukurov Kadastr agentligi huzuridagi Davlat kadastrlari palatasining Termiz shahar filiali rahbari M.Meliyev ishtirokida fuqarolar murojaatida ko‘rsatilgan masalani joyiga chiqib o‘rgandilar.

O‘rganish davomida “Yulduz” mahallasining Shiroq ko‘chasi bosh qismida fuqarolar tomonidan xonadonlari ro‘parasidagi umumiy foydalanishdagi yo‘l hududiga sun’iy to‘siqlar o‘rnatilgani aniqlandi.

Mazkur holat, o‘t o‘chirish, tez tibbiy yordam hamda boshqa maxsus va yirik hajmli transport vositalarining ko‘chaga erkin kirib-chiqishiga to‘sqinlik qilayotgani bilan jiddiy ahamiyat kasb etadi.

Mas’ullar tomonidan joyiga chiqib o‘rganish jarayonida o‘rnatilgan to‘siqlar tegishli fuqarolarning shaxsiy mulk chegarasiga kirmasligi, umumfoydalanishdagi yo‘l qismida joylashtirilgani hamda bunday holatga yo‘l qo‘yilishi mumkin emasligi tushuntirildi.

Fuqarolarga amaldagi qonunchilik talablari, umumiy foydalanishdagi yo‘llardan barcha aholi uchun erkin va xavfsiz foydalanish zarurligi bo‘yicha tegishli tushuntirishlar berildi.

Shuningdek, yo‘l qatnoviga xalaqit berayotgan sun’iy to‘siqlarni bartaraf etish yuzasidan tegishli ko‘rsatmalar berilib, masalani qonuniy tartibda hal etish choralari belgilandi.

📌 Kengash tomonidan fuqarolar murojaatlarida ko‘tarilayotgan masalalarni joyiga chiqqan holda o‘rganish, qonuniylikni ta’minlash va aholi uchun qulay shart-sharoitlar yaratish yuzasidan deputatlik nazorati davom ettiriladi.