Termiz shahrida mahalla boshqaruv tizimini takomillashtirish, “Mahalla yettiligi” vakillari faoliyatini muvofiqlashtirish hamda aholi muammolarini joyida o‘rganish yuzasidan deputatlik nazorati davom etmoqda.

Xalq deputatlari Termiz shahar Kengashining 17-“Surxon sohili” saylov okrugi deputati B. Raxmatullayev hamda Kengash kotibiyati bosh mutaxassisi R.Mamashukurov “Surxon sohili” mahallasida bo‘lib, mahalla mas’ullarining faoliyatini yaqindan o‘rgandilar.

Nazorat-tahlil jarayoni Oliy Majlis Senati tomonidan mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari asosida hamda O‘zbekiston Respublikasi Prezidentining 2026-yil 24-iyundagi PF-116-sonli “Mahalla boshqaruvini samarali tashkil etishga oid qo‘shimcha chora-tadbirlar to‘g‘risida”gi Farmoni ijrosini ta’minlash maqsadida tashkil etildi.

O‘rganish davomida:

Mahalla raisi — xonadonbay xatlov, aholi murojaatlari bilan ishlash, hududni obodonlashtirish va mahalla boshqaruvini muvofiqlashtirish;
Xotin-qizlar faoli — “Ayollar daftari” bilan ishlash, xotin-qizlar bandligini ta’minlash, ularni kasb-hunarga yo‘naltirish hamda oilaviy ajrimlarning oldini olish;
Profilaktika inspektori — jinoyatchilik va huquqbuzarliklarning barvaqt oldini olish, kriminogen vaziyatni barqarorlashtirish va jamoat xavfsizligini ta’minlash;
Yoshlar yetakchisi — “Yoshlar daftari” imkoniyatlaridan samarali foydalanish, ishsiz yoshlar bandligini ta’minlash, imtiyozli kreditlardan foydalanish hamda yoshlarning bo‘sh vaqtini mazmunli tashkil etish.

O‘rganish yakunida mahalla faollariga aholi bilan xonadonbay ishlash tizimini yanada kuchaytirish, aniqlangan muammolarni tezkor hal etish hamda belgilangan vazifalar ijrosini ta’minlash yuzasidan tegishli tavsiya va ko‘rsatmalar berildi.