Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat J.Sadirov tomonidan tumanning “Burchmullo” mahallasi bo‘yicha hokim yordamchisi M.Yuldasheva faoliyati o‘rganildi.

🔺O‘rganish davomida mahalladagi oilalarning ijtimoiy-iqtisodiy holati, kambag‘allik reyestriga kiritilgan oilalar bilan olib borilayotgan ishlar, ularning bandligini ta’minlash, daromad manbalarini yaratish hamda mavjud muammolarini bartaraf etishga qaratilgan chora-tadbirlarga e’tibor qaratildi. Ma’lumotlarga ko‘ra, ayni vaqtda mahallada 31 ta oila Kambag‘allik reyestriga kiritilgan. Ularning 10 tasi davlat ta’minotida, 20 tasi kambag‘al, 1 ta oila esa kambag‘allik chegarasida ekani qayd etildi.

🔺Deputat tomonidan har bir oilaning holatini alohida o‘rganish, ularni kambag‘allikdan chiqarishda mavjud imkoniyatlardan samarali foydalanish zarurligi ta’kidlandi. Bunda oilalarda mehnatga layoqatli a’zolarning bandligini ta’minlash, ularni doimiy daromad manbaiga ega bo‘lishlariga ko‘maklashish, o‘zini o‘zi band qilish va tadbirkorlik faoliyatiga jalb etish kabi yo‘nalishlarga e’tibor qaratish muhimligi qayd etildi.

🔺Shuningdek, davlat tomonidan ko‘rsatilayotgan ijtimoiy yordamlardan samarali foydalanish bilan bir qatorda, oilalarning o‘z imkoniyatlarini ishga solishi va barqaror daromad manbaiga ega bo‘lishiga qaratilgan manzilli ishlarni kuchaytirish bo‘yicha tavsiyalar berildi.