Xususan, rejalashtirilgan 57 ta ko‘p kvartirali uy o‘rniga 60 ta uyda ta’mirlash ishlari amalga oshirilgani, uylarning tom, fasad, yerto‘la qismlari, elektr taqsimlovchi shitlari va kirish yo‘laklari ta’mirlangani, shuningdek, energiya tejamkor quyosh panellari asosidagi ko‘cha yoritish chiroqlari o‘rnatilgani qayd etildi.

Sessiyada ichimlik suvi va oqova suv tizimlari, elektr va tabiiy gaz ta’minoti, avariya-tiklash xizmatlarining shay holati, shuningdek, ijtimoiy soha obyektlarining kuz-qish mavsumiga tayyorgarligi ham atroflicha muhokama qilinmoqda.

Alohida e’tibor elektr ta’minotidagi 413 ta transformator punkti, 873,8 km elektr tarmoqlari, gaz ta’minotidagi 345,9 km tarmoqlar va 378 ta gaz taqsimlash punktining mavsumga tayyorgarlik holatiga qaratilmoqda.

Deputatlar tomonidan mavsum davomida yuzaga kelishi mumkin bo‘lgan avariya holatlarini tezkor bartaraf etish, iste’molchilarga elektr energiyasi, tabiiy gaz va ichimlik suvini barqaror yetkazib berish, ko‘p kvartirali uy-joy fondi hamda ijtimoiy soha obyektlarida aniqlangan kamchiliklarni bartaraf etish yuzasidan mas’ullarga tegishli savol va takliflar bildirilmoqda.

Shuningdek, aholi uchun belgilangan 990 tonna ko‘mirni o‘z vaqtida yetkazib berish masalasi ham deputatlar e’tiborida bo‘lib, mavsum boshlanishidan oldin mavjud masalalarni to‘liq hal etish zarurligi ta’kidlanmoqda.

Muhokamalar yakunida kuz-qish mavsumini barqaror va betalofat o‘tkazish, mavjud kamchiliklarni bartaraf etish hamda mas’ul tashkilotlar faoliyatini kuchaytirish bo‘yicha tegishli vazifalar belgilanadi.