Xalq deputatlari viloyat va tuman Kengashlari deputatlarining 2026-yil birinchi yarim yillik faoliyati yuzasidan saylovchilar oldida axborot berish reja-grafigiga muvofiq, Xalq deputatlari Farg‘ona viloyati Kengashi deputati M.Xurboyev hamda XALQ DEPUTATLARI BAG‘DOD TUMANI KENGASHI RAISI D.Karimovalar tomonidan “Tuvadoq” mahalla fuqarolar yig‘inida saylovchilar bilan ochiq muloqot uchrashuvi o‘tkazildi.

Uchrashuvda TUMAN HOKIMI M.Isaqov, Kengash kotibiyati mudiri G‘.Abdullayev, tuman hokimi o‘rinbosarlari, tegishli korxona va tashkilotlar rahbarlari hamda mahalla faollari ishtirok etdi.

Muloqot davomida deputatlar tomonidan 2026-yilning birinchi yarim yilligida amalga oshirilgan deputatlik faoliyati yuzasidan batafsil axborot berildi. Jumladan, Kengash sessiyalarida ko‘rib chiqilgan dolzarb masalalar va qabul qilingan qarorlar, deputatlik so‘rovlari hamda ularning ijrosi, saylovchilardan kelib tushgan murojaatlar bilan ishlash holati, hududdagi ijtimoiy-iqtisodiy muammolarni hal etish, obodonlashtirish, infratuzilmani yaxshilash va aholi manfaatlarini ta’minlash borasida amalga oshirilgan ishlar yuzasidan ma’lumotlar taqdim etildi.

Shuningdek, uchrashuv davomida fuqarolar tomonidan bildirilgan murojaatlar ham tinglanib, ularni hal etish bo‘yicha zarur choralar belgilandi. Xususan, 44-son davlat maktabgacha ta’lim tashkilotida qo‘shimcha bino qurish zarurligi yuzasidan ko‘tarilgan masala Kengash raisi, tuman hokimi hamda viloyat Kengashi deputatlari ishtirokida joyiga chiqib o‘rganildi.

O‘rganish yakunida tuman hokimi tomonidan mas’ul tashkilotlarga tegishli topshiriqlar berilib, mazkur qo‘shimcha binoni homiylar ko‘magida barpo etish bo‘yicha amaliy ishlarni boshlash belgilandi.