📚 “Ko’mak” loyihasi imkoniyatlar loyihasi: Bandixon tumanida “Bilimdon” o‘quv markazi o'z faoliyatini boshladi

Bandixon tumanida yoshlarning bilim olishi, zamonaviy kasb va tillarni egallashi uchun yaratilayotgan sharoitlar amalda o‘z samarasini bermoqda. Ana shunday ezgu ishlarning yana bir yorqin namunasi — Paxtakor mahallasida yangi “Bilimdon” o‘quv markazining ish boshlagani bo‘ldi.

Bugun ushbu maskanning tantanali ochilish marosimi bo‘lib o‘tdi. Unda tuman hokimi, Xalq deputatlari Bandixon tumani Kengashi deputati Abdumalik Allamuradov, mahalla faollari hamda yoshlar ishtirok etdi.

E’tiborlisi, markaz tashabbuskori Toshtemir Xolto’rayev davlatimiz yaratib berayotgan imkoniyatlardan samarali foydalanib, Yoshlar tadbirkorligini rivojlantirish jamg‘armasining “Ko‘mak” loyihasi doirasida 130 million so‘m ssuda olib, ushbu zamonaviy ta’lim maskanini tashkil etdi.

Endilikda Paxtakor mahallasidagi yoshlar uzoq masofaga qatnamasdan, o‘z hududiga yaqin joyda sifatli ta’lim olish imkoniga ega bo‘lishadi. Markazda ingliz tili, matematika, fizika, tarix va boshqa fanlardan xalqaro va milliy sertifikatlarga ega ustozlar saboq beradi.

Bu kabi markazlar nafaqat bilim maskani, balki yoshlarning orzulari sari dadil qadam tashlashiga xizmat qiladigan muhim maydondir. Bandixonda ta’limga e’tibor, yoshlar kelajagiga ishonch va amaliy qo‘llab-quvvatlash izchil davom etmoqda.