XALIQ MÁPI JOLÍNDA ÁMELIY ISLER

    Xalıq deputatları Qaraózek rayonlıq Keńesi tárepinen jıl basınan berli 6 márte sessiya ótkerilip, olarda 59 másele kórip shıǵıldı hám tiyisli sheshimler qabıl etildi. Keńes sessiyalarında atqarıwshı hákimiyat hám huqıq qorǵaw uyımları basshılarınıń 19 márte esabat hám málimlemeleri tıńlandı.
   Keńes deputatları tárepinen mámleketlik uyımlardıń lawazımlı shaxslarına seksen altı deputatlıq sorawı jiberilip, olardıń seksen úshine juwap berildi. Úsh deputatlıq soraw úyreniw procesinde. Bul sorawlar tikkeley keńes iskerliginde saylawshılar múrájat hám mashqalaları tiykarında hámde siyasiy partiyalardıń deputatlıq toparları is-rejesine muwapıq nızam, qararlardıń orınlanıwı boyınsha tiykarlanǵan maǵlıwmat sorap tiyisli mámleketlik uyımlar basshılarınan maǵlıwmat alınbaqta.
     Keńes deputatları tárepinen óz saylaw okruglerinde xalıq penen 108 márte ushırasıwlar ótkerilip, bul ushırasıwlarda saylawshılar tárepinen kóterilgen 91 mashqalalı máseleniń 62 másele unamlı sheshimine erisildi. Jáne de jergilikli Keńes deputatlarınıń "Máhálle jetiligi" menen óz-ara birge islesiwi sheńberinde Keńestegi 18 deputat 13 máhállege, sonday-aq, aymaqlardı rawajlandırıw baǵdarlamalarına kirgizilgen 41 joybarlarǵa mánzilli biriktirilgen bolıp, xalıq wákilleri bul joybarlardıń óz waqtında hám sapalı ámelge asırılıwın qadaǵalap kelmekte.
     Búgingi kúnde deputatlar tárepinen 24 obekt hám joybarlardıń orınlanıwı boyınsha úyreniwler alıp barılıp, 24 márte puqaralar qabıllawları shólkemlestirildi.

    Jıl basınan Keńes deputatlarına puqaralar tárepinen 86 múrájat kirgizilip, 38 múrájat unamlı sheshilgen, 48 múrájatqa bolsa túsinik berilgen.
    Keńestiń tastıyıqlaǵan 59 sheshimi de "E-kengash" sisteması arqalı rásmiy járiyalandı, sonday-aq, normativlik xarakterdegi 2 qarar joybarı ádillik uyımınan ekspertizadan ótkerildi.
   Ótkerilgen Keńes sessiyalarınıń altawı da social tarmaqlarda tuwrıdan -tuwrı jarıtılıp,  onlayn tárizde translyaciya etildi. Deputatlar tárepinen ámelge asırılıp atırılǵan ilajlar, Keńes iskerligi 18 márte televidenie, 44 radio, 50 gazeta, 116 internet sayt hám 456 márte sociallıq tarmaqlarda jarıtıldı.
      Men, 15-sanlı, “Fazılov” saylaw okruginen Xalıq deputatları Qaraózek  rayonlıq Keńesi deputatı sıpatında usı jıl basınan belgilengen keste tiykarında óz saylawshılarım aldında ámelge asırǵan jumıslarım boyınsha saylawshılar menen ushırasıwlar ótkerip,  esabat berip kelmektemen.
    Ushırasıwlar dawamında elimizde ámelge asırılıp atırǵan keń kólemli demokratiyalıq reformalar, ásirese, mámleketimiz basshısı tárepinen Qaraqalpaqstan Respublikasın sociallıq-ekonomikalıq rawajlandırıw, xalıqtıń abadanlıǵın arttırıw, injenerlik-kommunikaciya infrastrukturasın jaqsılaw, jańa jumıs orınların jaratıw jáne sociallıq qorǵaw sistemasın bekkemlewge qaratılǵan Párman hám qararlardıń mazmun-mánisi haqqında keńnen maǵlıwmat berildi.
     Sonday-aq, Xalıq deputatları Qaraózek rayonlıq Keńesiniń sessiyalarında qabıl etilgen qararlar, olardıń xalıqtıń turmıs dárejesin jaqsılaw, aymaqlardı kompleksli rawajlandırıw hám sociallıq mashqalalardı sheshiwdegi áhmiyeti boyınsha túsindiriw jumısları alıp barıldı.
     Ushırasıwda usı jıl ushın qabıl etilgen "Máhállelerdi rawajlandırıw hám jámiyetti ilgeriletiw jılı" Mámleketlik baǵdarlaması sheńberinde belgilengen tiykarǵı wazıypalar, máhálleler infrastrukturasın rawajlandırıw, xalıqtı sociallıq qollap-quwatlaw, bántlikti támiyinlew, isbilermenlikti rawajlandırıw, bilimlendiriw, densawlıqtı saqlaw hám ekologiyalıq turaqlılıqtı támiyinlewge qaratılǵan ilajlar haqqında da tolıq maǵlıwmat berildi.
Jıl basınan saylawshılardan jámi 19 múrájat kelip tústi. Olardıń hárbiri ornında úyrenilip, tiyisli mámleketlik hám xojalıq basqarıw uyımları jáne juwapker shólkemler menen birgelikte kórip shıǵıldı. Nátiyjede múrájatlardıń tiykarǵı bólegi unamlı sheshildi, qalǵanları boyınsha ámeliy ilajlar kórilmekte. Sonıń ishinde, rayondagı “Mádeniyat” APJ aymaǵı xalqı arasında kem támiyinlengen eki shańaraqtıń turmıs sharayatın jaqsılaw menen birge, bir shańaraq ajırımınıń aldın alıw, aymaqta sporttı rawajlandırıw haqqındaǵı múrájatları unamlı sheshilip, xalıq ushın áhmiyetli bolǵan mashqalalarǵa sheshim tabıldı. Bul bolsa saylawshılardıń turmıs sapası hám sharayatın jáne de jaqsılawǵa xızmet etti.
        Ushırasıwlar dawamında saylawshılar mámleketimizde ámelge asırılıp atırǵan reformalardı keńnen qollap-quwatlaytuǵının, mámleketimiz tárepinen insan qádirin ulıǵlaw, xalıqtı sociallıq qorǵaw hám aymaqlardı rawajlandırıw baǵdarında ámelge asırılıp atırǵan jumıslar óz turmıslarında ayqın sezilip atırǵanın ayrıqsha atap ótti.
     Quwanıshlı tárepi, saylaw okrugim aymaǵındaǵı jollardı asfaltlaw, isbilermenlikti rawajlandırıw, jasıl qaplamalı sport maydanshaları sıyaqlı áhmiyetli mashqalalar basqıshpa-basqısh sheshilmekte. Bul baǵdarda xalıq penen turaqlı pikirlesiw, olardıń pikir-usınısların esapqa alıw deputatlıq iskerligimniń tiykarǵı baǵdarlarınan biri bolıp qalmaqta.
    Sonıń menen birge, xalıq deputatları Qaraózek rayonlıq Keńesiniń sessiyalarında deputatlar menen birgelikte saylawshılar máplerin qorǵaw, xalıqtı oylandırıp atırǵan sociallıq máselelerdi kóteriw, qabıl etilip atırǵan sheshimlerdiń xalıq máplerine xızmet etiwi boyınsha óz usınıs hám baslamalarımdı alǵa qoyıp kelmektemen.
      Keleshekte de saylawshılarım menen turaqlı sóylesiw, olardıń mashqala hám usınısların tereń úyreniw, hár bir múrájatqa juwapkershilik penen qatnas jasaw jáne olardıń nızamlı máplerin qorǵaw deputatlıq jumısımnıń tiykarǵı baǵdarı bolıp qaladı.

YUSUPOVA Gulistan Jamalatdinovna,
Xalıq deputatları  Qaraózek  rayonlıq Keńesi baslıǵı, 15-sanlı, “Fazılov” saylaw okruginen deputat