Халқ депутатлари Наманган вилояти Кенгаши котибияти мудири Т. Гаппаров, вилоят Кенгаши депутати Х. Ходжиматов ҳамда котибият мудири О. Ҳошимовлар томонидан Тўрақўрғон тумани “Озод” маҳалласида амалга оширилаётган ишлар ҳолати ўрганиб чиқилди.

Ўрганиш давомида Жаҳон банкининг “Қишлоқ инфратузилмасини ривожлантириш” лойиҳаси доирасида маҳаллада амалга оширилган кенг кўламли ишлар юзасидан батафсил маълумотлар тақдим этилди. Хусусан, ички кўчаларнинг асфальтлаштирилгани, электр тармоқларининг тўлиқ янгиланиб, замонавий таянч устунлари ўрнатилгани аҳоли турмуш шароитини яхшилаш, қулай инфратузилма яратиш ва маҳалла қиёфасини тубдан ўзгартиришга хизмат қилаётгани таъкидланди.

Шунингдек, ўрганиш жараёнида депутатлар томонидан ҳудуддаги мавжуд камчиликлар ҳам аниқланиб, уларни бартараф этиш юзасидан тегишли ташкилотларга депутат сўровлари юбориш масаласи белгилаб олинди. Ҳар бир муаммони босқичма-босқич ҳал этиш ва аҳоли мурожаатларига самарали ечим топиш борасида аниқ вазифалар қўйилди.

Мазкур ишлар маҳаллаларни янада обод қилиш, аҳоли учун муносиб ва фаровон турмуш шароитини яратиш, шунингдек, ижтимоий-иқтисодий ривожланишни жадаллаштиришга хизмат қилади. Бу борадаги ишлар изчил давом эттирилиши таъкидланди.