Yoshlar uchun yangi imkoniyatlar sari muhim tashabbus


Xalq deputatlari Navoiy shahar Kengashi raisi Baxtiyor Bazarov, XDP shahar kengashi raisi J. Hamroyev hamda kotibiyat bosh mutaxassisi D. Toyirovlar “Yoshlik” mahallasida bo‘lib, hududdagi mavjud bo‘sh turgan yer maydonlarini o‘rganib chiqdilar.

O‘rganish jarayonida mazkur hududda uzoq vaqtdan buyon foydalanilmay kelinayotgan yer maydonlaridan biri yoshlar uchun zamonaviy sport infratuzilmasini yaratish maqsadida samarali yo‘naltirish taklifi ilgari surildi. Xususan, ushbu bo‘sh yer maydonida zamonaviy stadion qurish masalasi ko‘rib chiqildi.
Mas’ullar tomonidan loyiha tashabbusi qo‘llab-quvvatlanib, mazkur taklifni amalga oshirish yuzasidan tegishli tartibda shahar Kengashi sessiyasi kun tartibiga kiritish bo‘yicha kelishib olindi. Ta’kidlanishicha, bunday loyihalar yoshlarning sportga bo‘lgan qiziqishini oshirish, sog‘lom turmush tarzini keng targ‘ib qilish hamda mahalla infratuzilmasini rivojlantirishda muhim ahamiyat kasb etadi.

Shuningdek, uchrashuv davomida hududni obodonlashtirish, aholi uchun qulay sharoitlar yaratish va mavjud imkoniyatlardan samarali foydalanish masalalari ham muhokama qilindi.
Tashabbus yakunida mas’ullar bunday loyihalarni izchil davom ettirish, mahallalarda bo‘sh turgan yer maydonlarini samarali foydalanishga yo‘naltirish orqali aholi farovonligini oshirish ustuvor vazifalardan biri ekanini ta’kidladilar.