Халқ депутатлари Наманган вилояти Кенгаши котибияти мудири Т. Гаппаров, вилоят Кенгаши депутатлари Н. Муҳаммадиева, Д. Хатамова ҳамда Янгиқўрғон тумани Кенгаши депутатлари ва котибият ходимлари томонидан ҳудудда олиб борилаётган ободонлаштириш ишлари жойига чиққан ҳолда кўздан кечирилди.

Ўрганиш давомида Жаҳон банки молиявий кўмагида амалга оширилаётган қишлоқ инфратузилмасини ривожлантириш лойиҳаси доирасида “Гулшан” маҳалла фуқаролар йиғинидаги ички йўлларни асфальтлаш ишлари билан яқиндан танишилди.

Маълум қилинишича, ушбу лойиҳа учун Жаҳон банки томонидан 1,6 миллиард сўм миқдорида маблағ ажратилган бўлиб, жами 4,5 километр йўлни асфальтлаш режалаштирилган. Айни вақтда ҳудуднинг 700 метр қисмида асфальт ётқизиш ишлари муваффақиятли якунланган.

Ўрганиш жараёнида йўл қурилишининг сифати, асфальт қопламасининг белгиланган техник талабларга мувофиқлиги, ишлар жадаллиги ҳамда аҳоли учун яратилаётган қулайликлар атрофлича таҳлил қилинди. Шу билан бирга, мутасадди ташкилот вакилларига қурилиш ишларини белгиланган муддатларда ва юқори сифат даражасида якунлаш юзасидан зарур тавсиялар берилди.