Yoshlar maslahat guruhi tomonidan yoshlar masalalariga doir qaror loyihalarini ishlab chiqish hamda ularni keng jamoatchilik muhokamasidan o’tkazishga bag’ishlangan navbatdagi yig’ilish tashkil etildi. Mazkur yig’ilishda mahalliy Kengash deputati M.Bozorov, yoshlar yetakchilari, faol yoshlar ishtirok etib, hududda yoshlarga oid davlat siyosatini samarali amalga oshirish yuzasidan fikr va takliflar bildirildi.

Yig’ilish davomida yoshlarning ta’lim olishi uchun yaratilayotgan shart-sharoitlar, ularning bandligini ta’minlash, tadbirkorlikka jalb etish, kasb-hunarga o’qitish, bo’sh vaqtlarini mazmunli tashkil etish hamda ijtimoiy himoyaga muhtoj yoshlarni qo’llab-quvvatlash masalalari atroflicha muhokama qilindi. Shuningdek, yoshlar o’rtasida kitobxonlik madaniyatini oshirish, sport va madaniy tadbirlarga keng jalb qilish, axborot texnologiyalari va zamonaviy kasblarga qiziqishini kuchaytirishga qaratilgan takliflar ham ilgari surildi.

Deputat tomonidan yoshlar bilan ishlash tizimini yanada takomillashtirish, ularning muammolarini o’z vaqtida o’rganish va amaliy yechim topish masalalariga alohida e’tibor qaratildi. Qaror loyihalarini tayyorlashda yoshlarning fikr va tashabbuslarini inobatga olish muhim ahamiyat kasb etishi ta’kidlanib, har bir taklif asosli ravishda ko’rib chiqildi.

Muhokamalar jarayonida hududlarda yoshlar infratuzilmasini rivojlantirish, sport maydonchalari va to’garaklar faoliyatini kengaytirish, iqtidorli yoshlarni rag’batlantirish hamda ularning startap va innovasion g’oyalarini qo’llab-quvvatlash bo’yicha amaliy chora-tadbirlar belgilab olindi. Bundan tashqari, huquqbuzarlik va turli salbiy holatlarning oldini olish, yoshlarni vatanparvarlik va milliy qadriyatlarga hurmat ruhida tarbiyalash bo’yicha ham fikr almashildi.

Tadbir yakunida bildirilgan taklif va mulohazalar asosida qaror loyihalarini yanada takomillashtirish, ularning ijrosini samarali ta’minlash hamda yoshlarning jamiyat hayotidagi faol ishtirokini kengaytirish yuzasidan muhim vazifalar belgilab olindi.