Olmaliq shahrida aholi osoyishtaligini ta’minlash hamda yoshlarni ijtimoiy foydali mehnatga jalb etish borasidagi deputatlik nazorati amaliy natijalar bermoqda.

Kuni kecha "Bo‘ston" mahallasida Xalq deputatlari Olmaliq shahar Kengashi kotibiyat mudiri Sevara Qodirova hamda 13-saylov okrugi deputati Bahodir Miralimov ishtirokida navbatdagi o‘rganish ishlari o‘tkazildi.

O‘rganish davomida mahalla raisi va profilaktika inspektori hamda yoshlar yetakchisi bilan hamkorlikda jinoyatchilikka moyilligi bo‘lgan yoshlar bilan yuzma-yuz muloqot tashkil etildi.

Suhbat jarayonida yoshlardan 1 nafari oliy ta’lim muassasasi talabasi bo‘la turib, darslarni surunkali ravishda qoldirib kelayotganligi ma’lum bo‘ldi. Deputatlar tomonidan talabaga ta’limning kelajakdagi o‘rni va qonunbuzarlikning ayanchli oqibatlari haqida tushuntirish berildi. Hozirda ushbu talabaning darslarda muntazam qatnashishi va ta’lim jarayoniga qaytishi deputatlar tomonidan alohida nazoratga olindi.

Yoshlarning bandligini ta’minlash va ularni to‘g‘ri yo‘lga yo‘naltirish bo‘yicha quyidagi choralar ko‘rildi:

Ekskursiya tashkil etildi: Deputatlar tavsiyasiga ko‘ra, mahalla hokim yordamchisi va yoshlar yetakchisi tomonidan yoshlar uchun "MULTINATIONAL MINE GROUP" MCHJ XKga ekskursiya uyushtirildi.

Yoshlar korxonadagi ishlab chiqarish jarayonlari bilan yaqindan tanishdilar. Korxona mutasaddilari tomonidan ularga munosib mehnat sharoitlari va bo‘sh ish o‘rinlari taklif etildi.

✍️Xulosa:

Bu kabi tadbirlar nafaqat yoshlarning bandligini ta’minlashga, balki oliy ta’lim olayotgan yigit-qizlarning yo‘ldan adashmasligiga va jamiyatda o‘z o‘rnini topishiga xizmat qiladi.

✅Deputatlarimiz har bir yoshning taqdiri va ta’limi uchun mas’uliyatni his etgan holda ishlashda davom etadilar.