Deputatlar va yoshlar uchrashuvi

30-iyun – Yoshlar kuni munosabati bilan Xalq deputatlari Farg‘ona tuman Kengashi deputatlari Ozodaxon Dadajonova, Fayzullo Mirzayev, Abdusamat Alobidinov, O‘zbekiston “Adolat” SDP Farg‘ona tuman Kengashi raisi Nodirbek Karimov, tuman IIB boshlig‘ining xotin-qizlar masalalari bo‘yicha o‘rinbosari Surayo Musayevalar tumanning Farg‘ona MFY hududida joylashgan “Tong” bolalar oromgohida maroqli dam olayotgan o‘quvchi-yoshlar bilan uchrashdilar.

Uchrashuv davomida o‘quvchi-yoshlar ishtirokida shaxmat, stol tennisi, badminton, arqon tortish, kubik-rubik yig‘ish kabi yo‘nalishlarda sport musobaqalari bo‘lib o‘tdi. Ularda oromgohda dam oluvchi yoshlar va tarbiyachilar o‘zlarining aqliy va jismoniy salohiyatini yana bir bor sinovdan o‘tkazishdi.

Shundan so‘ng, deputatlarning yoshlar bilan ochiq muloqoti bo‘lib o‘tdi. Samimiy va ko‘tarinki ruhdagi suhbatda O.Dadajonova bugungi kunda mamlakatimizda yoshlarni qo‘llab-quvvatlash borasidagi ishlar davlat siyosati darajasida ko‘tarilganligini alohida ta’kidlab, Vatanga muhabbat, ta’lim-tarbiya, mehnat qilishi, kasb sir-asrorlarini puxta o‘rganishi, iqtidorini namoyon etishi uchun barcha imkoniyatlar yaratilganligi haqida to‘xtalib, barcha yoshlarni “30-iyun – Yoshlar kuni” bilan tabriklab, ularga foydali bilim va kelgusida Jonajon Vatanimiz ravnaqiga o‘z hissasini qo‘shishga qodir inson bo‘lib yetishishlarini tiladi.