Mazkur tadbirda Xalq deputatlari Samarqand shahar Kengashi deputati Dilmurod Nasimov, "Siz Samarqandning birodar shaharlarini bilasizmi?" tanlovi g‘oliblari, ommaviy axborot vositalari vakillari, xorijiy talabalar, yoshlar hamda mutasaddi tashkilotlar vakillari ishtirok etdilar.

Pres-tur doirasida ishtirokchilar Samarqandning tarixiy-me’moriy obidalari, boy madaniy merosi, zamonaviy infratuzilma obyektlari hamda turizm salohiyati bilan yaqindan tanishdilar. Shuningdek, Samarqand shahrining dunyoning 30 dan ortiq shaharlari bilan o‘rnatilgan birodarlik aloqalari, ushbu hamkorlik doirasida amalga oshirilayotgan qo‘shma loyihalar, madaniy almashinuv dasturlari hamda yoshlar uchun yaratilayotgan xalqaro imkoniyatlar haqida batafsil ma’lumot berildi.
Tadbir davomida yoshlar va OAV vakillari ishtirokida ochiq muloqot tashkil etilib, xalq diplomatiyasini rivojlantirish, madaniyatlararo aloqalarni mustahkamlash, yoshlarning xalqaro maydondagi faolligini oshirish hamda axborot almashinuvini kengaytirish masalalari yuzasidan fikr almashildi.

Xalq deputatlari Samarqand shahar Kengashi deputati Dilmurod Nasimov bunday xalqaro uchrashuvlar yoshlarning dunyoqarashini kengaytirish, Samarqandning xalqaro nufuzini yanada mustahkamlash, shuningdek, xorijiy hamkorlar bilan do‘stona aloqalarni rivojlantirishda muhim ahamiyat kasb etishini ta’kidladi.

Tadbir yakunida ishtirokchilar bunday loyihalar turli mamlakatlar yoshlari o‘rtasida do‘stlik va hamjihatlikni mustahkamlash, xalq diplomatiyasini rivojlantirish hamda O‘zbekistonning xalqaro maydondagi nufuzini yuksaltirishga xizmat qilishini alohida e’tirof etdilar.