Uvaysiy mahallasida tashkil etilgan uchrashuvda Kengash kotibiyati bosh mutaxassisi N.Akbarova, mahalla yettiligi vakillari hamda mahalla faollari ishtirok etdilar.

Muloqot davomida deputat kotibiyat tomonidan tayyorlangan tahliliy ma’lumotlar asosida shaharni ijtimoiy-iqtisodiy rivojlantirish dasturida belgilangan vazifalar ijrosi, hududda amalga oshirilayotgan bunyodkorlik va obodonlashtirish ishlari, shuningdek, saylov okrugida olib borilgan ishlar haqida saylovchilarga batafsil ma’lumot berdi.

Uchrashuvda Uvaysiy mahallasidagi ichki yo‘llarni asfaltlashtirish masalasiga alohida e’tibor qaratildi. Jumladan, O‘zbekiston Respublikasi Vazirlar Mahkamasining 2024-yil 11-oktabrdagi 665-son qarori asosidagi Xalq deputatlari Marg‘ilon shahar Kengashining 2026-yil 8-iyundagi VII-27-43-11-168-K/26-son qarori bilan tasdiqlangan 2026-yilgi ichki yo‘llarni saqlash va joriy ta’mirlash dasturi doirasida mahallada asfaltlashtirish ishlari boshlangani ta’kidlandi.

Mazkur ishlar aholi uchun qulay transport qatnovini ta’minlash, ichki yo‘llar holatini yaxshilash hamda hudud infratuzilmasini rivojlantirishda muhim ahamiyat kasb etadi.

Shuningdek, mahallada kommunal infratuzilmani yaxshilash, hududni obodonlashtirish va fuqarolar uchun munosib turmush sharoitlarini yaratish borasidagi ishlar ham muhokama qilindi.

Uchrashuv ochiq muloqot ruhida o‘tib, deputatlik faoliyati yuzasidan saylovchilarga axborot berish, hududdagi dolzarb masalalarni muhokama qilish va aholi bilan hamkorlikni mustahkamlashga xizmat qildi.

Bunday uchrashuvlar deputatning saylovchilar oldidagi mas’uliyatini oshirish, hududdagi muammolarni o‘z vaqtida aniqlash hamda ularning yechimi yuzasidan tegishli choralar ko‘rilishiga ko‘maklashishda muhim o‘rin tutadi.