Xalq deputatlari Marg‘ilon shahar Kengashi deputati, 25-Orolbo‘yi saylov okrugi deputati M.Abdurahmonova Orolbo‘yi mahallasidagi Al-Farg‘oniy ko‘chasida amalga oshirilayotgan asfaltlashtirish ishlari bilan joyiga chiqqan holda tanishdi.

O‘rganish davomida ko‘chada boshlangan asfalt yotqizish ishlari va hududdagi mavjud holat ko‘zdan kechirildi. Mazkur ishlar O‘zbekiston Respublikasi Vazirlar Mahkamasining 2024-yil 11-oktyabrdagi 665-son qarori asosida Xalq deputatlari Marg‘ilon shahar Kengashining 2026-yil 8-iyundagi VII-27-43-11-168-K/26-son qarori bilan tasdiqlangan 2026-yilgi ichki yo‘llarni saqlash va joriy ta’mirlash dasturi doirasida amalga oshirilmoqda.

25-Orolbo‘yi saylov okrugi deputati M.Abdurahmonova tomonidan hududdagi ichki yo‘llar holati o‘rganilib, Al-Farg‘oniy ko‘chasini asfaltlashtirish masalasi deputatlik nazorati doirasida ko‘tarilgan edi. Mazkur masala belgilangan tartibda ko‘rib chiqilib, ichki yo‘llarni saqlash va joriy ta’mirlash dasturi doirasida Kengash sessiyasi muhokamasiga kiritildi. Bugun esa ushbu masalaning amaliy yechimi sari muhim qadam tashlanib, ko‘chada asfaltlashtirish ishlari boshlandi.

Al-Farg‘oniy ko‘chasining asfaltlanishi mahalla ichki yo‘llari holatini yaxshilash, transport harakati uchun qulaylik yaratish hamda aholining kundalik qatnovi bilan bog‘liq muammolarni kamaytirishga xizmat qiladi.

Deputat M.Abdurahmonova tomonidan hududdagi muammolarni o‘rganish, aholi manfaatlariga daxldor masalalarni tegishli tartibda ko‘tarish va ularning amaliy yechimini kuzatib borish orqali deputatlik nazorati izchil davom ettirilmoqda.