25-Yakkabog‘ saylov okrugidan saylangan deputat Mirzaulukov Zafar Zohid o‘g‘liga biriktirilgan Xalq deputatlari Chilonzor tumani Kengashi kotibiyati bosh mutaxassisi Mirzayeva Hulkar tomonidan Yakkabog‘ mahallasida joylashgan ko‘p qavatli uy liftining texnik holati o‘rganildi.

O‘rganish davomida liftning barqaror, uzluksiz va xavfsiz ishlashida qator muammolar mavjudligi aniqlandi. Xususan, liftning ayrim hollarda 5-qavatgacha to‘xtamasdan harakatlanishi, boshqaruv tugmalarining nosozligi, shuningdek, qisqa muddat ishlaganidan so‘ng uzoq vaqt davomida foydalanish imkoniyati bo‘lmayotgani ma’lum bo‘ldi.

Mazkur holatlar ko‘p qavatli uyda istiqomat qiluvchi fuqarolarning haqli e’tirozlariga sabab bo‘lmoqda. Ayniqsa, keksalar, nogironligi bo‘lgan shaxslar hamda yosh bolali oilalar uchun liftning xavfsiz va uzluksiz ishlashi muhim ahamiyat kasb etadi.


O‘rganish yakunlari bo‘yicha deputat bilan birgalikda masalani tegishli mutasaddi tashkilotlar oldiga qo‘yish, liftni to‘liq texnik ko‘rikdan o‘tkazish, aniqlangan nosozliklarni bartaraf etish hamda uning xavfsiz va uzluksiz ishlashini ta’minlash yuzasidan deputatlik so‘rovi kiritish belgilab olindi.