Ózbekstan Respublikası Prezidenti Shavkat Mirziyoyevtiń Qaraqalpaqstan Respublikasına gezektegi saparı aymaq turmısında áhmietli waqıya boldı. Sapar dawamında Qaraqalpaqstannıń bar imkaniyatların tolıq iske qosıw, ekonomikalıq belsendilikti arttırıw, xalıq ushın jańa dáramat dáreklerin jaratıw hám aymaqtı bunnan bılay da rawajlandırıwǵa qaratılǵan áhmiyetli wazıypalar belgilep berildi. Qaraqalpaqstanda isbilermenlik ortalıǵın bunnan bılay da rawajlandırıw ushın jaratılıp atırǵan imkaniyatlardıń ámeliy kórinisi sıpatında bahalayman. Búgin aymaǵımızda jańa kárxanalar shólkemlestiriw, óndiristi keńeytiw, investiciyalıq joybarlardı ámelge asırıw hám zamanagóy texnologiyalardı engiziw ushın barǵan sayın kóbirek sharayatlar jaratılmaqta. Sapar dawamında bahası 7,6 milliard dollarlıq joybarlarǵa start berilgeni Qaraqalpaqstan ekonomikasında jańa basqısh baslanıp atırǵanınan dárek beredi. Bunday iri joybarlardıń ámelge asırılıwı jańa óndirislik quwatlıqlardı jaratıw menen birge, mıńlaǵan puqaralardı jumıs penen támiyinlew, jergilikli ekonomikalıq belsendilikti arttırıw hám xalıqtıń dáramatların kóbeytiwge xızmet etedi. Ásirese, isbilermenler ushın jaratılıp atırǵan salıq hám basqa da jeńillikler úlken áhmiyetke iye. Payda, jer hám múlk salıqlarınıń eki esege azaytılıwı, sanaat kárxanaları ushın elektr energiyası tarifleriniń tómenletiliwi jáne sociallıq salıq stavkasınıń 1 procent etip belgileniwi biznes wákillerine qosımsha imkaniyatlar jaratpaqta. Bunday jeńillikler, bárinen burın, isbilermennen juwapkershilik hám baslama talap etedi. Jaratılıp atırǵan sharayatlardan únemli paydalanıp, jańa joybarlardı turmısqa engiziw, jergilikli shiyki zattan nátiyjeli paydalanıw, zamanagóy hám básekige shıdamlı ónimler islep shıǵarıw jáne jańa jumıs orınların jaratıw - búgingi isbilermenniń tiykarǵı wazıypalarınan biri. Qaraqalpaqstannıń ekonomikalıq potencialı tek ǵana sanaat penen sheklenbeydi. Aymaqta awıl xojalıǵı, energetika, xızmet kórsetiw, logistika hám basqa da baǵdarlarda da úlken imkaniyatlar bar. Ásirese, qayta tikleniwshi energiya dáreklerinen paydalanıw baǵdarındaǵı joybarlar keleshek ushın ayrıqsha áhmiyetke iye. Beruniy hám Qaraózek rayonlarında samal elektr stanciyalarınıń qurılısı da aymaqtıń energetika potencialın arttırıwǵa xızmet etpekte. Jasıl energetikaǵa itibardıń kúsheyiwi Qaraqalpaqstan ushın jańa investiciyalıq baǵdarlardı ashıp, zamanagóy hám ekologiyalıq turaqlı ekonomika qáliplesiwine tiykar jaratadı. Búgingi kúnde Qaraqalpaqstan aldında úlken imkaniyatlar turıptı. Eń áhmiyetlisi, bul imkaniyatlardı anıq joybarlar, nátiyjeli basqarıw hám intakerlik arqalı ámeliy nátiyjege aylandırıw bolıp esaplanadı. Tábiyǵıy resurslar, jer maydanları,
miynet potencialı, isbilermenlik ortalıǵı hám aymaqtıń geografiyalıq imkaniyatlarınan aqılǵa uǵras paydalanıw arqalı Qaraqalpaqstannıń ekonomikalıq potencialın bunnan bılay da arttırıw múmkin. Men deputat sıpatında aymaǵımızda ámelge asırılıp atırǵan reformalarda belsene qatnasıw, xalıq hám isbilermenlerdiń múrájatların úyreniw olardıń nızamlı máplerin qollap-quwatlaw hám jańa baslamalardı alǵa qoyıwdı áhmietli wazıypam dep bilemen. Búgin biz ushın eń áhmiyetli wazıypa - jaratılıp atırǵan imkaniyatlardı tek ǵana kútip alıw emes, al olardan nátiyjeli paydalanıw bolıp tabıladı. Hár bir jańa joybar- jańa jumıs ornı, hár bir jańa kárxana - jańa dáramat dáregi, hár bir
investiciya bolsa aymaqtıń keleshegine qoyılǵan investiciyadır. Xalqımızdıń miynet súygishligi, isbilermenlerdiń intakerligi hám aymaǵımız ushın jaratılıp
atırǵan keń imkaniyatlar úylesip, Qaraqalpaqstannıń ekonomikalıq rawajlanıwın jáne de jedellestiredi, dep isenemen. Qaraqalpaqstan - imkaniyatları keń,
keleshegi ullı aymaq. Jańa maqsetlerge qaray isenimli qádem taslaw bolsa bárshemizdiń ulıwma wazıypamız

Asamatdin Redjepov,

Xalıq deputatları Shomanay rayonlıq Keńesiniń
deputatı.