Nogironligi bo‘lgan shaxslarning huquqlarini ta’minlash – inson qadrini ulug‘lashning muhim mezoni

O‘zbekiston Respublikasining "Nogironligi bo‘lgan shaxslarning huquqlari to‘g‘risida"gi Qonuni Qonunchilik palatasi tomonidan 2020-yil 22-iyulda qabul qilingan hamda Senat tomonidan 2020-yil 11-sentabrda ma’qullangan.


Mazkur Qonun nogironligi bo‘lgan shaxslarning huquq va erkinliklarini kafolatlash, ularning jamiyat hayotining barcha sohalarida teng va to‘laqonli ishtirok etishini ta’minlash, kamsitilishining oldini olish hamda davlat tomonidan har tomonlama qo‘llab-quvvatlashning huquqiy asoslarini belgilaydi.

Qonunga muvofiq, nogironligi bo‘lgan shaxslar:

💠 ta’lim olish va kasb-hunar egallash;
💠 mehnat qilish va munosib ish o‘rinlariga ega bo‘lish;
💠 sifatli tibbiy xizmat hamda reabilitatsiya vositalaridan foydalanish;
💠 ijtimoiy himoya, nafaqa va boshqa davlat kafolatlaridan foydalanish;
💠 davlat organlari, transport, axborot-kommunikatsiya tizimlari hamda ijtimoiy infratuzilma obyektlaridan to‘siqsiz foydalanish huquqlariga ega.

Shuningdek, qonunda nogironligi bo‘lgan shaxslarning sha’ni va qadr-qimmatini hurmat qilish, ularga nisbatan har qanday kamsitish holatlariga yo‘l qo‘ymaslik, qulay va inklyuziv muhit yaratish davlat hamda jamiyatning ustuvor vazifalaridan biri sifatida belgilangan.

Bugungi kunda mamlakatimizda nogironligi bo‘lgan shaxslarning ijtimoiy faolligini oshirish, bandligini ta’minlash, zamonaviy ta’lim va tibbiy xizmatlardan foydalanish imkoniyatlarini kengaytirish, shuningdek, ularning jamiyat hayotida faol ishtirok etishi uchun zarur sharoitlar yaratish borasida izchil islohotlar amalga oshirilmoqda.

Har birimiz nogironligi bo‘lgan shaxslarning huquqlarini hurmat qilish, ularga nisbatan mehr-oqibat va e'tibor ko‘rsatish orqali yanada inklyuziv va adolatli jamiyatni barpo etishga o‘z hissamizni qo‘shamiz.