Xalq deputatlari Vobkent tumani Kengashi huzuridagi Yoshlar maslahat guruhining navbatdagi yigʻilishi boʻlib oʻtdi. Yigʻilishda yoshlar masalalariga oid dolzarb yoʻnalishlar muhokama qilinib, kelgusidagi vazifalar belgilab olindi.

✔️Yigʻilish davomida, avvalo, tumanda yoshlarning yozgi taʼtil davrini mazmunli va samarali tashkil etishga qaratilgan “Dolzarb 90 kun” chora-tadbirlar dasturining ijrosi koʻrib chiqildi. Dastur doirasida yoshlarni sport, madaniyat, sanʼat, kitobxonlik hamda kasb-hunarga yoʻnaltirish boʻyicha amalga oshirilayotgan ishlar tahlil qilinib, mavjud imkoniyatlardan yanada samarali foydalanish yuzasidan takliflar bildirildi.

📎Shuningdek, Yoshlar maslahat guruhi tomonidan 2026-yilning oʻtgan olti oyi davomida amalga oshirilgan ishlar sarhisob qilindi. Hisobotlar asosida erishilgan natijalar, mavjud muammolar va ularni bartaraf etish boʻyicha zarur chora-tadbirlar muhokama etildi.

🖊Kun tartibidagi yana bir muhim masala sifatida hududlarda yoshlar bilan bogʻliq muammolar yuzasidan olib borilgan oʻrganishlar natijalari koʻrib chiqildi. Tahlillar asosida yoshlarning bandligini taʼminlash, boʻsh vaqtini mazmunli tashkil etish hamda ularni ijtimoiy qoʻllab-quvvatlashga qaratilgan takliflar ishlab chiqildi.

📌Yigʻilish yakunida muhokama qilingan masalalar yuzasidan tegishli tavsiyalar qabul qilinib, yoshlar manfaatlarini taʼminlash va ularning faolligini oshirishga qaratilgan vazifalar belgilab olindi. Yoshlar maslahat guruhi tomonidan ilgari surilgan takliflarning amaliyotga joriy etilishi yuzasidan masʼullarga tegishli topshiriqlar berildi.