Deputat sorawına tiykar Shımbay rayonı «Insan» sociallıq xızmetleri orayı hám Shımbay rayonı Densawlıqtı saqlaw bólimi tárepinen rásmiy maǵlıwmat usınıldı.

Shımbay rayonı "Insan" sociallıq xızmetler orayı tárepinen puqara Abdurazakova Guljamaldıń múrájatı belgilengen tártipte kórip shıǵılıp, jaǵday boyınsha hár tárepleme úyreniw alıp barıldı. Úyreniw procesinde múrájatta keltirilgen máseleler boyınsha tiyisli shólkem hám mákemelerden maǵlıwmatlar alındı.
Anıqlanıwınsha, múrájat iyesiniń perzenti Qalmuratov Yusupbektiń densawlıǵı menen baylanıslı jaǵday boyınsha ámeldegi nızamshılıq talaplarına muwapıq medicinalıq-sociallıq ekspert komissiyasına usınılıwı kerek bolǵan hújjetler elektron sistema arqalı jiberilgen. Házirgi waqıtta hújjetler wákillikli komissiya tárepinen kórip shıǵılıw procesi dawam etpekte.
Shımbay rayonı densawlıqtı saqlaw bólimi tárepinen usınılǵan maǵlıwmatqa bola, puqara Qalmuratov YUsupbek 2024-jıl 6-iyul kúni tuwılǵan bolıp, medicinalıq tekseriw nátiyjelerine tiykarlanıp oǵan tuwma limfoblastoma (shep jaq-tómengi moyın aymaǵı) diagnozı qoyılǵan.
Málim etiliwinshe, bala 1 ay 9 kúnlik waqtında Balalar milliy medicina orayında xirurgiyalıq ámeliyat arqalı emlengen. Házirgi waqıtta onıń densawlıǵı qanaatlandırarlı bolıp, shıpakerlerdiń usınısına muwapıq ambulator emleniw hám qayta qadaǵalaw tekseriwinen ótiw ushın jiberilgen.
Múrájatta kóterilgen másele boyınsha nızamshılıqta belgilengen tártipte ilajlar kóriliwi támiyinlenip, nátiyjesi boyınsha múrájat iyesine qosımsha túrde xabar beriletuǵını málim etiledi.


Xalıq deputatları Shımbay rayonlıq Keńesi