Xalıq deputatları Bozataw rayonlıq Keńesiniń 10-sanlı "Kókshiel" saylaw okruginen saylanǵan deputat K.Tileumuratova rayonlıq medicina birlespesi xızmetkerleri menen birgelikte "Biz náshebentlikke qarsımız!" atamasındaǵı túsindiriw jumısların alıp bardı.

Ushırasıwdıń tiykarǵı maqseti - náshebentliktiń aldın alıw, puqaralarǵa onıń insan den-sawlıǵına keltiretuǵın zıyanı haqqında túsinik beriw hám jámiyette salamat turmıs tárizin qáliplestiriw.

Ilaj dawamında medicina tarawı xızmetkerleri tárepinen náshebentliktiń insan organizmine, ásirese, jaslar salamatlıǵına tásiri haqqında maǵlıwmatlar berildi. Sonıń menen birge, den-sawlıqtı saqlaw, durıs awqatlanıw, fizikalıq belsendilik penen shuǵıllanıw hám zıyanlı ádetlerden uzaq bolıwdıń áhmiyeti túsindirildi.

Ushırasıwǵa qatnasqan puqaralar ózlerin qızıqtırǵan sorawların berip, medicina xızmetkerlerinen tiyisli juwap hám usınıslar aldı.

Deputat K.Tileumuratova tárepinen bunday túsindiriw jumısların jergilikli aymaqta turaqlı túrde alıp barıwdıń, ásirese jaslar arasında salamat turmıs tárizin keńnen úgit-násiyatlawdıń zárúrligi atap ótildi.

Salamat áwlad - salamat jámiyet tiykarı!
Náshebentlikke qarsı gúres tek medicina tarawınıń emes, al pútkil jámiyettiń ulıwma wazıypası.