QONUN IJROSINI TA’MINLASH BO‘YICHA O‘RGANISH ISHLARI BOSHLANDI

Xalq deputatlari Quva tuman Kengashining joriy yil iyun oyiga mo‘ljallangan
chora-tadbirlar rejasiga muvofiq, tuman sanitariya-epidemiologik osoyishtalik
va jamoat salomatligi bo‘limida O‘zbekiston Respublikasining “Aholining
sanitariya-epidemiologik osoyishtaligi to‘g‘risida”gi O‘RQ-393-son Qonuni
ijrosini ta’minlash bo‘yicha amalga oshirilayotgan chora-tadbirlar yuzasidan
o‘rganish ishlarini o‘tkazish belgilangan.

Mazkur o‘rganish ishlarini sifatli tashkil etish maqsadida tuzilgan ishchi
guruh tarkibiga Kengashning tegishli doimiy komissiyasi a’zolari, soha
mutaxassislari, huquqshunoslar, Kengash huzuridagi ekspert guruhi hamda Yoshlar
maslahat guruhi a’zolari, shuningdek, O‘zLiDeP, O‘zXDP, MTDP va O‘EP siyosiy
partiyalari vakillari kiritildi.

Kotibiyat mudiri R.Nodirov rahbarligida o‘tkazilgan mashg‘ulot davomida
qonunning mazmun-mohiyati yana bir bor o‘rganilib, uni amalda qo‘llash
mexanizmlari hamda o‘rganish jarayonini tizimli tashkil etish masalalariga
alohida e’tibor qaratildi. Shuningdek, ishchi guruh tomonidan o‘rganish
ishlarini samarali tashkil etish hamda qonun ijrosini to‘g‘ri baholash
yuzasidan kelishib olindi.

Bundan tashqari, o‘rganish jarayonida aniqlangan muammolarni tizimli tahlil
qilish, ular yuzasidan asoslangan taklif va tavsiyalar ishlab chiqish hamda
qonun ijrosini samarali ta’minlashga qaratilgan amaliy choralarni belgilash
bo‘yicha kelishib olindi. Shuningdek, ishchi guruh a’zolarining vazifa va
mas’uliyatlarini aniq belgilash, o‘rganish natijalarini belgilangan tartibda
rasmiylashtirish hamda ular asosida tegishli qaror va tavsiyalarni tayyorlash
zarurligi qayd etildi.