FARMON IJROSI YUZASIDAN OLIB BORILAYOTGAN ISHLAR TAHLIL QILINDI

Xalq deputatlari Quva tuman Kengashi deputati M.Axmadaliyeva hamda tuman
Kengashi kotibiyati bosh mutaxassisi A.Fozilov Madaniyat mahalla fuqarolar
yig‘inida bo‘lib, O‘zbekiston Respublikasi Prezidentining 2023-yil
21-dekabrdagi “Mahalla institutining jamiyatdagi rolini tubdan oshirish va
uning aholi muammolarini hal etishda birinchi bo‘g‘in sifatida ishlashini
ta’minlashga qaratilgan chora-tadbirlar to‘g‘risida”gi PF–209-son Farmoni
ijrosi doirasida amalga oshirilayotgan ishlar holatini o‘rgandilar.

O‘rganish jarayonida mahalla raisi tomonidan aholi muammolarini aniqlash va hal
etish, ijtimoiy himoyaga muhtoj oilalarni qo‘llab-quvvatlash, kambag‘allikni
qisqartirish, bandlikni ta’minlash, yoshlar va xotin-qizlar bilan manzilli
ishlash, huquqbuzarliklar profilaktikasini tashkil etish hamda mahallaning
ijtimoiy-ma’naviy muhitini yanada yaxshilash borasida olib borilayotgan ishlar
tahlil qilindi.

Shuningdek, Farmonda belgilangan vazifalardan kelib chiqqan holda mahalla raisi
faoliyatining samaradorligi, aholi murojaatlari bilan ishlash tizimi,
“xonadonbay” va “fuqarobay” ishlash amaliyoti, mavjud muammolarni tegishli
tashkilotlar bilan hamkorlikda hal etish holatiga alohida e’tibor qaratildi.

O‘rganish yakunida mahalladagi ijtimoiy-iqtisodiy masalalarni hal etish, aholi
bilan muloqot samaradorligini oshirish, murojaatlar ijrosini ta’minlash va
PF–209-son farmonida belgilangan ustuvor vazifalarni to‘liq amalga oshirish
yuzasidan tegishli tavsiya va takliflar berildi.